Кабо-Верде қай тарзда Жаҳон чемпионатига йўлланмани қўлга киритди?

2026 йил АҚШ, Канада ва Мексика давлатлари мезбонлик қиладиган Жаҳон чемпионати сюрпризларга бой бўлиши кутилмоқда. Чунки бу сафар тарихида ҳеч қачон мундиалда қатнашмаган Ўзбекистон, Иордания ва Африканинг Кабо-Верде терма жамоалари мусобақа иштирокчисига айланди. Шу жамоалардан энг сўнггиси — Кабо-Верде қандай қилиб Жаҳон чемпионатига чиқиш бахтига муяссар бўлди?

Жаҳон чемпионати саралашининг Африка қитъасидаги "D" гуруҳида иштирок этган Кабо-Верде 10 тур давомида 6 та ғалаба, 3 та дуранг ва 1 та мағлубият қайд этди. “Кўк акулалар” ушбу натижалар эвазига 21 очко жамғариб, гуруҳда биринчи ўринни эгаллади. Бубиста шогирдлари шу тариқа кучли таркибга эга Камерунни ортда қолдиришга муваффақ бўлди. Ушбу жамоа сафида Андре Онана, Франк Ангуисса, Карлос Балеба, Брайан Мбемуо каби кучли лигаларда тўп сурадиган футболчилар бор эди.

Қизиқарли жиҳати шундаки, Африканинг ғарбида жойлашган бу кичик орол давлатининг майдони атиги 4 000 кв.км бўлиб, бу кўрсаткич Ўзбекистоннинг энг кичик вилояти бўлган Андижондан ҳам кичиккина (Андижон — 4 300 кв.км). Аҳолиси эса бор-йўғи 583 минг кишини ташкил этади. Жаҳон чемпионати тарихида бундан кичик ҳудудга эга мамлакат ҳали иштирок этмаган.

Келаси ёзда бўлиб ўтадиган Жаҳон чемпионатида жами 48 та терма жамоа иштирок этади. Улардан деярли ярми аллақачон маълум. Энди эса Кабо-Верде ҳам ўз тарихида илк бор мундиал саҳнасида ўз байроғини хилпиратади.