Камилла Раҳимова Ўзбекистон байроғи остида нуфузли WТА 125 турнирининг ғолиби бўлди

Ўзбекистон терма жамоаси вакили Камилла Раҳимова Франциянинг Анже шаҳрида якунланган "WТА 125 Open Angers Loire" турнирида чемпионликни қўлга киритди. Ҳал қилувчи финал учрашувида Камилла германиялик Татяна Корпачни 6–3, 7–6(4) ҳисобида мағлуб этди.

Финалнинг илк дақиқалариданоқ Раҳимова кортда барқарорлик ва тажовузкор ўйин намойиш қилди. Биринчи сетда у тезда устунликни қўлга олиб, 6–3 ҳисобида ғалабага эришди. Иккинчи сетда тенг кураш кузатилди, аммо Камилла асосий вазиятларда совуққонликни сақлаб, тай-брекда 7–6(4) ҳисобида устун келди.

Камилланинг чемпионлик сари йўлида турнирнинг иккинчи рақамли теннисчиси — хорватиялик Ана Ружич устидан қозонган 4–6, 6–3, 7–5 ҳисобидаги иродали ярим финал ғалабаси ҳафтанинг энг ёрқин лаҳзаларидан бири бўлди.

Анжедаги ғалаба Раҳимованинг WТА 125 даражасидаги жорий мавсумдаги илк чемпионлиги бўлиб, унинг Ўзбекистон байроғи остида ўтказган муваффақиятли стартининг муҳим босқичига айланди.

Ўзбекистон теннис федерацияси Камилла Раҳимовани ёрқин ғалаба билан табриклайди ва келгуси турнирларда омад тилаб қолади.

Бу ҳақда Ўзбекистон теннис федерацияси матбуот хизмати хабар бермоқда.