Камолиддин Мурзоев: "Жаҳон футболидагилар учун Кубок финали орқали ўзбек футболи маданиятини кўрсатиб бера олдик"

Ўзбекистон Кубоги финали бутун умрга тарихга муҳрланиб қолди. У энди ҳеч қачон ёддан чиқмайди. Бундй фантастик муҳит, майдондаги ақлбовар қилмас ўйин, барчаси ҳамон қизғин баҳс-муҳокамаларда. Ўйинни бевосита стадионида кузатиб борган Ўзбекистон футболчилар уюшмаси раҳбари, собиқ футболчи Камолиддин Мурзоев финал ҳақида Sports.uz сайтига интервью берди.

- Финал қандай тасаввур қилгандингиз ва ўйиндан кейинги таассуротларингиз қандай бўлди?

- Ўйин борасида гапирадиган бўлсам, бу финалда асосий “планга” финал атрофидаги воқеалар – мухлислар, перформанслари, ишқибозларнинг ўзаро баҳси катта саҳнага чиқади, деган ўйда эдим. Ҳақиқатан ҳам ўйин атрофидаги атмосфера шу нарсани кўрсатиб турганди. Лекин майдонда ўйнаган футболчиларга ҳам катта миннатдорчилик айтсак бўлади. Улар финални безаб турган мухлислардан ҳам ортиқ финални бизга тақдим этишди, деб ўйлайман. Чунки бундай хиссиёт, бундай ҳаяжонларни сўнгги дақиқаларгача тақдим этилиши камдан-кам финалларда учрайди, айниқса, бизнинг футболда. Ҳамма учун эсда қоладиган, ажойиб ўйин бўлди.

- Кўпчилик "Навбаҳор"нинг имкониятини юқори баҳолаганди ва бу табиий эди. "Андижон"нинг ғалабасини кутмаганмидингиз?

- Очиғини айтадиган бўлсак, финалда камдан-кам катта фаворитлар бўлади. Чунки бир ўйиндан иборат. Бу учрашувда иккала жамоани имкониятларини тенг баҳоласа адолатли бўларди. Айниқса, клубларни иккинчи даврада кўрсатаётган ўйинлари нуқтаи назаридан. Баъзи-бир мутахассисларни “Навбаҳор”ни фаворит дейишларига ҳам сабаблари йўқ эмас. Таркиб жиҳатидан, терма жамоа вакиллари наманганликлар сафида тўп суришяпти. Шу сабабли ҳам учрашувдан олдин “Навбаҳор” фаворит сифатида кўрсатилганди. Финалда ҳамма нарса бўлиши мумкинлиги шу куни ўз тасдиғини топди. Финалда номлар эмас, ҳакам хуштагидан сўнг майдондагилар ҳамма нарсани ўз қўлларига олиши ва буни исботлашлари керак бўлади.

- Умуман олганда, "Андижон" ниманинг эвазига ютиб кетди? Ҳолбуки, "Навбаҳор" ҳисобда олдинда эди ва асосий вақтда ютиб кетиши ҳам мумкин эди...

- Менимча, “Андижон” учрашув олдидан ва умуман мавсум давомида кўрсатаётган ўйинларига эътибор қаратадиган бўлсак, ўзининг асосий қуроллари, яъни, стандарт вазиятлар эвазига ютиб кетди. Ўйин тизгини ва ўйинни олиб борилишида ҳам “Андижон” айнан шу нарсага эътибор бераётгани аниқ эди. Бу клубни фойдаланиши мумкин бўлган яна бир фактори бор эди. Аммо “Навбаҳор” “Андижон”нинг тезкор қарши ҳужумларига йўл қўймади. Бу учрашувда иккала жамоа ҳам деярли бешта ҳимоячи билан майдонда ҳаракат қилишди. “Навбаҳор”ни ҳам бу ўйинда ҳимоявий тактикадан фойдаланганлиги “Андижон”нинг биз билган қарши ҳужумларига йўл қўйиб бермади. Яъни, биринчи қуролини ёпа олди. Иккинчиси бўлган стандарт вазиятлардан “Андижон” ютиб кетди.

-  Бу ўзбек футболининг энг яхши рекламаси дейиш мумкинми?

- Сўнгги пайтларда ўзбек футболининг мавқеи кўтарилиб боряпти. Буни очиқ айтишимиз керак ва бу том маънода кўплаб жаҳон футболидаги инсонлар учун финал орқали ўзбек футболи маданиятини кўрсатиб бера олдик, деб ўйлайман.  ПФЛ, ЎФА барча ушбу ўйин учун ишлаган шахслар юқори нотада кўрсатиб бера олди. Хоҳлардикки, бундай учрашувлар кўп бўлса янада ажойиб. Мухлисларнинг ўзлари ҳам завқланишди. Бояги фикримга қайтмоқчиманки, кўпчидик бу ўйинга айнан ўйин атрофидаги атмосфера учун ҳам келганди.

- Айтиб ўтганингиздек, ўйин атрофидаги атмосферага ҳам қизиқиш катта бўлди ва амалда икка жамоа мухлислари нималарга қодирлигини кўрсатишди. Савол шундан иборатки, ушбу ўйиндан кейин қайси жамоа мухлислари Ўзбекистонда биринчи рақамли?

- Буни бироз илмоқли савол деб ўйлайман. Менимча, бу руҳда қарамаслик керак. Мухлислар ўз клубларини яхши даражада қўллаб-қувватлашяпти. Шу боис бу нарсани умумий тушунчада ва ўзбек футболи ривожи йўлида кимнидир алоҳида кўрсатиш менимча яхши эмас. Барча ишқибозлар бир-бирини ҳурмат қилиб, мана шундай атмосфера яратадиган бўлишса, бундан фақат футболимиз ютади. Кўрдингиз, мухлисларнинг энергияси майдонга ҳам ўтади. Ўзимиздан ҳам қанийди ёш пайтимизга қайтсак, мана шундай юқори даражадаги муҳитда ҳеч бўлмаса 10-15 дақиқа футбол ўйнай олсак, деган хис-туйғу ўтди, буни яшириб бўлмайди. Шунинг учун қайсидир жамоанинг мухлисларини алоҳида таъкидлаб ўтмоқчи эмасман. Иккала жамоа ишқибозлари ўйинни “ёндиришди”. Уларга алоҳида миннатдорчилик билдириш керак. Бошқа жамоа мухлисларини ҳам аста-секинлик билан шундай қўллаб-қувватлашга чорлаб қолиш керак.