Каннаваро: "Биз Уругвайдан қўрқмаймиз ва ўз ўйинимизни кўрсатмоқчимиз"

Ўзбекистон миллий терма жамоаси эртага Уругвайга қарши ўртоқлик ўйинида майдонга тушади. Жамоа бош мураббийи Фабио Каннаваро ва дарвозабон Абдувоҳид Неъматов ушбу баҳс олдидан матбуот анжуманида иштирок этиб, қуйидагича фикр билдирди.

Фабио Каннаваро:
Аввало, ташриф учун барчага раҳмат айтаман. Биз кеча Малайзияга етиб келдик, тикланиш машғулотларини ўтказдик ва эртанги учрашувга тайёргарликни бошладик. Бу аввалги учрашувдан кўра фарқли ўйин бўлади. Биз дунёдаги энг кучли жамоалардан бири ва энг кучли мураббийлардан бири — Марсело Бьелсага қарши баҳс олиб борамиз. Бизни олдинда жуда қийин ўйин кутиб турибди. Биз Уругвайдан қўрқмаймиз ва ўз ўйинимизни кўрсатмоқчимиз. Бу ўртоқлик учрашуви, аммо майдонда бор кучимизни ишга соламиз. Бу ўзимизни кўрсатиш учун яхши имконият. Тўпни кўпроқ назорат қилишга ҳаракат қиламиз, чунки рақибга имконият бериш мумкин эмас. Вазириятни ўз қўлимизга олишимиз керак. Ҳар доим ҳам ҳужумда ҳаракат қилиб бўлмайди.

Жаҳон чемпионатида дунёнинг энг кучли жамоаларига қарши ўйинлар ўтказамиз. Биз айнан шундай учрашувларга тайёргарлик кўришимиз лозим. Танқидлар бўлиши табиий, лекин биз ҳамма спорт турларида бўлгани каби натижа ҳақида ўйлашимиз зарур. Ўртоқлик ўйини бўлса-да, бор имкониятимизни ишга солишимиз, қаттиқ меҳнат қилишимиз ва биргаликда ҳаракат қилишимиз керак. Бу спорт, шунинг учун ҳар бир жиҳатни эътиборга олиш муҳим.

Ўртоқлик учрашувлари — ўзимизни кўрсатиш учун имконият, чунки мундиалда бундай имконият бўлмайди. Олдинда узоқ сафар кутяпти, шунинг учун баъзи футболчиларни ортиқча чарчатишни истамадик. Мен уларнинг барчаси билан суҳбатлашдим. Жаҳон чемпионатигача ҳали 8 ой вақт бор ва биз барча футболчиларнинг ўйинини диққат билан кузатамиз.

Абдувоҳид Неъматов:
"Мураббийимиз таъкидлаганидек, тикланиш машғулотини ўтказдик. Эртанги ўйинга тайёрмиз ва бор кучимиз билан ҳаракат қиламиз.Уругвай жаҳонда ўз ўрнига эга жамоа. Мураббийларимиз билан бирга уларнинг ўйинларини таҳлил қиляпмиз — ҳар қандай жамоанинг кучли ва кучсиз томонлари бўлади. Биз эса ўз ўйинимизни кўрсатишга ҳаракат қиламиз".

 Маълумот учун, икки терма жамоа ўртасидаги беллашув 13 октябрь куни соат 17:45'да старт олади.