Каннаваро: "Футболчиларим қўрқмас ва енгилмас руҳда бўлишини хоҳлайман"

Ўзбекистон миллий терма жамоаси бош мураббийи Фабио Каннаваро матбуот анжуманида Жаҳон чемпионати олдидан жамоанинг ҳолати, чақирувлар ва режалар ҳақида фикр билдирди.

— Айни пайтда футболчиларнинг жисмоний ҳолати қандай?

"Миллий чемпионат темпи юқори эмаслиги сабабли лига билан келишган ҳолда мусобақани вақтинча тўхтатдик ва жисмоний тайёргарлик устида алоҳида ишлашни бошладик. Машғулотларда айрим футболчилар қийналаётганини кўрдик. Лекин яхши томони — ҳеч ким шикоят қилмаяпти ва ҳар бири ўзини кўрсатиш учун ҳаракат қилмоқда".

— Нега ўйин амалиёти кам бўлган футболчилар чақирилди?

"Бу қарорларни мутахассислар билан маслаҳатлашган ҳолда қабул қилдик. Масалан, Ҳусайн Норчаев ва Аббосбек Файзуллаевнинг ўйинларини кузатдим. Ҳозирча ўйин амалиёти кам бўлса ҳам, улар мундиалда жамоага фойда келтириши мумкин".

— Сиз аввал "менга жангчи футболчилар керак" дегандингиз. Бу йиғинда шундай руҳни кўрдингизми?

"Мен футболчиларимнинг енгилмас ва ҳеч кимдан қўрқмайдиган бўлишини хоҳлайман. Шу маънода "отдек кучли бўлишлари керак" дегандим. Чунки рақибларимиз оддий эмас. Колумбия, Португалия ва Конго ДРга қарши ўйинлар осон кечмайди".

— Мухлислар терма жамоадан нималар кутса бўлади?

"Биздан жуда катта натижалар кутишяпти, ҳатто чемпионликни кутаётганлар ҳам бор. Лекин бу бизнинг илк мундиалимиз. Шунинг учун футболчиларга ортиқча босим бермаслигимиз керак. Энг муҳими — ушбу турнирдан завқ олиш. Ишонаманки, футболчилар халқимиз ва Ватан шарафи учун бор кучини беради".

— Стандарт вазиятлар устида иш кетяптими?

"Албатта. Замонавий футболда стандарт вазиятлар ҳал қилувчи аҳамиятга эга. Бир мавсумда 15–20 та голни айнан шу орқали уриш мумкин. Шунинг учун бу жиҳат устида ҳам жиддий ишлаяпмиз".

— Назорат учрашувлари учун рақиблар қандай танланди?

"Биз вице-президент ва мураббийлар штаби билан маслаҳатлашган ҳолда рақиб танладик. Канадани танлашимизга асосий сабаб — улар мундиал мезбони ва у ерда ўрганишимиз керак бўлган жиҳатлар бор. Нидерландия эса ўйин услуби ва жисмоний тайёргарлиги жиҳатидан Португалияга ўхшайди. Шу сабаб айнан шу икки жамоани танладик. Бошқа таклифлар ҳам бўлган, аммо қароримиз шу бўлди".