Каннаваро: "Жаҳон чемпионатида ҳеч кимни олдиндан кучли деб бўлмайди"

Италия терма жамоаси сафида 2006 йилги жаҳон чемпионатида ғолиб чиққан афсонавий ҳимоячи Фабио Каннаваро Ўзбекистон миллий терма жамоаси билан тарихий ЖЧ–2026 иштирокини олдидан ўз фикрлари билан ўртоқлашди.

Мутахассиснинг таъкидлашича, Ўзбекистон терма жамоасида катта иштиёқ ва ўсишга бўлган интилиш мавжуд.

"Бу Ўзбекистоннинг жаҳон чемпионатидаги илк иштироки. Мен учун ҳам мураббий сифатида бундай мусобақада қатнашиш биринчи марта.

Жамоада катта мақсадларга эга футболчиларни кўрдим. Улар ўрганишни, ривожланишни ва қаттиқ меҳнат қилишни истайди. Бизда йўқотадиган нарса йўқ", — деди Каннаваро.

Маълумки, Ўзбекистон ЖЧ–2026 гуруҳ босқичида Конго ДР, Колумбия ва Португалия терма жамоаларига қарши баҳс олиб боради.

Каннаваро рақиблар кучли эканини тан олган ҳолда, жаҳон чемпионатида ҳар қандай натижа бўлиши мумкинлигини таъкидлади.

"Бу жуда қийин гуруҳ. Колумбия ва Португалия дунёнинг энг кучли 20 терма жамоаси қаторига киради.

Конго термасида ҳам Франция ва Англия чемпионатларида ўйнайдиган футболчилар кўп. Шунинг учун осон бўлмайди.

Аммо жаҳон чемпионатида қайси жамоа кучлироқ эканини олдиндан айтиш қийин. Бу — жаҳон чемпионати", — деди италиялик мутахассис.

Шунингдек, терма жамоа ярим ҳимоячиси Отабек Шукуров ҳам футболчилар босим ҳақида эмас, тарихий имконият ҳақида ўйлаётганини айтди.

"Бу жаҳон чемпионатидаги биринчи иштирокимиз. Биз босимни четга суриб, майдонга чиқишимиз, ўйиндан завқ олишимиз ва Ўзбекистон футбол мамлакати эканини кўрсатишимиз керак", — деди Шукуров.

Яна бир футболчи Умарали Раҳмоналиев эса терма жамоада рақобат ҳар қачонгидан ҳам кучайганини таъкидлади.

"Рақобат доимо бўлган, аммо жаҳон чемпионати олдидан янада кучайди. Биз мамлакат байроғини баланд кўтариш ва дунё саҳнасида салоҳиятимизни намойиш этиш учун бор кучимизни ишга соламиз", — деди Раҳмоналиев.