Манчестерликлар орзусидаги футболчи бўйича янги таклиф тайёрламоқда

«Манчестер Юнайтед» «Ньюкасл» таркибида тўп сурувчи чап қанот ҳимоячиси Льюис Холл бўйича янги таклиф тайёрламоқда. TEAMtalk нашрининг ёзишича, айнан шу футболчи манкунианликлар учун ушбу позициядаги асосий трансфер мақсади бўлиб қолмоқда.

Хабарга кўра, «Ньюкасл» 21 ёшли англиялик ҳимоячини сотиш тарафдори эмас ва унинг учун бу амплуадаги футболчилар орасида рекорд сумма талаб қилмоқчи. Эслатиб ўтамиз, 2019 йилда «Бавария» «Реал»дан Лукаc Эрнандесни харид қилиш учун 79 миллион евро тўлаган эди.

Льюис Холлнинг ўзи «Олд Траффорд»га кўчиб ўтиш вариантига қизиқиш билдиргани айтилмоқда. Аммо ҳозирча «Манчестер Юнайтед» унинг учун 80 миллион евро ёки ундан ортиқ миқдорда таклиф беришга тайёрми ёки йўқлиги аниқ эмас. Клуб камроқ сумма таклиф қилиш билан чекланиши ҳам мумкин.

Агар Холл бўйича келишув амалга ошмаса, «МЮ» бир қатор альтернатив номзодларни кўриб чиқади. Манбаларга кўра, эҳтимолий вариантлар қаторида «Расинг» ҳимоячиси Хорхе Салинас, «РБ Лейпциг» футболчиси Давид Раум, «Барселона»дан Алехандро Бальде, «Фулхэм» таркибидаги Антони Робинсон ҳамда «Борнмут» ҳимоячиси Адриен Трюффер номлари тилга олинмоқда.