Карвахаль “Реал”нинг ёш футболчисини “синдирди”

“Реал” машғулотларидан бирида нохуш ҳолат юз бергани маълум бўлди. Жамоанинг тажрибали ҳимоячиси Даниэль Карвахаль қўпол подкат ташлаши натижасида 19 ёшли Виктор Вальдепеньяс жиддий жароҳат олган.

Topskills Sports UK нашри хабарига кўра, бу воқеа февраль ойида, “Осасуна”га қарши Ла Лига ўйинидан олдин содир бўлган экан. Ўша баҳсда “Қироллик клуби” рақибга 1:2 ҳисобида ютқазиб қўйган.

Карвахаль етказган жароҳат оқибатида ёш футболчи қарийб бир ой майдондан четда қолишига тўғри келди.

Инсайдерлар 34 ёшли жамоа сардорининг машғулотдаги подкатини “жуда қўпол”, деб таърифламоқда.

Виктор Вальдепеньяс асосий жамоадаги илк ва ҳозирча ягона ўйинини ўтган йилнинг декабрь ойида “Алавес”га қарши баҳсда ўтказган ва ўшанда у асосий таркибда майдонга тушган.