Катанец эътибордан қочирган бешлик! Терма жамоадан кимлар чақирув олишга ҳақли эди?

Хабарингиз бор, Ўзбекистон миллий терма жамоаси бош мураббийи Сречко Катанец октябрь ойидаги ФИФА кунларида иккита ўртоқлик ўйинида майдонга тушади. Жамоа бош мураббийи Катанец ушбу йиғинга қуйидаги футболчиларни чақирди:

Элдор Шомуродовнинг йўқлигини ҳисобга олмаса, айтарли катта ўзгаришлар йўқ. Биз якуний рўйхатда бўлиши тахмин қилинган 5 футболчи борасида фикр юритмоқчимиз. Катанец эътиборидан четда қолган бешликни эътиборингизга ҳавола этамиз.

Азиз Амонов - Элдор йўқлигида синашнинг айни пайти!

Қаршида энди-энди ўзига келаётган форвард ОЧЛ доирасидаги "Ал Садд"га қарши баҳсда ҳозир ҳам Осиёнинг энг зўр страйкерларидан бири эканлигини барчага кўрсатиб қўйди. Яхши тезлик ва ўйинни ўқий олиши сабабли Азиз Катанецнинг жамоасида ортиқчалик қилмаган бўларди. Мураббий ҳужумчини аввалги ўйинларда синаб кўрган ва ўшанда Амонов кўпчиликда илиқ таассурот қолдирган эди. Бу сафарги йиғинда Шомуродовнинг йўқлиги ҳужум чизиғида қўшимча квота пайдо бўлишига сабаб бўлади, деб ўйлаган эдик, аммо бундай бўлим чиқмади. Шунга қарамай, ОЧЛда ҳафта рамзий жамоасидан ўрин эгаллаган йигит шу темпда ўйин кўрсатса, тез орада яна терма сафига қайтиши аниқ.

Забиҳилло Ўринбоев - Мураббийнинг имконияти

Ўзининг иккинчи ёшлигини ўтказаётган Ўринбоев икки сафардан бери мухлислар томонидан миллий терма жамоада кўриниш бериши тахмин қилинсада, якунда словениялик мутахассис бошқа вариантларни афзал кўрмоқда. Суперлигада гол+пас тизимида (7+4) 11 очко жамғаришга муваффақ бўлган йигит ҳақиқатдан ҳозир ажойиб спорт формада. У нафақат ҳужум маркази, балки классик 10-рақам эгаси сифатида форвард ортида ҳам тўп тепиши мумкин. Сўнгги ўйинларда айнан шу зонада ижрочи йўқлиги боис, Катанец Жалолиддин Машариповдан креатив марказий ярим ҳимоячи сифатида фойдаланмоқда. Айтмоқчиманки, Ўринбоев ҳозирги Катанецнинг 3 ва 4 ҳимоячига ихтисослашган схемасида керакли винтик вазифасини бажариб бериши мумкин эди. Афсуски, ҳозирча Мистер Сречко бунга эҳтиёж сезмади.

Ойбек Бозоров - Унутилаётган иқтидор

"Насаф" етакчиси сўнгги ўйинларда ўзининг ўйин манерасини ўзгартиргани кўзга ташланмоқда. Ойбек аввалгидек тўпни ўзига олмай, ҳужум тезлигини оширишга ҳаракат қилмоқда. "Насаф"да ҳам 2-3 мавсум аввалгидек дриблинг ёки финт намойиш этмаяпти. Ўнг ва чап қанотда бирдек ҳаракат қилишга қодир иқтидор бир неча сафардан бери терма жамоа рўйхатидан ўрин эгаллай олмаётгани ёқимсиз ҳолат. 6-7 йил аввал Ўзбекистон футболининг эртаси сифатида қаралган йигитни айни кучга тўлган пайтида мамлакатнинг бош жамоасида кўриниш бермаслиги ёқимсиз. Шунга қарамай, ярим ҳимоядаги кучли рақобат ҳам бунга сабаб бўлаётганини эътироф этиш лозим. Нима ҳам дердик, демак Бозоров Катанец наздида ҳали терма даражасида ўйин кўрсатмаяпти. "Аждарлар" креатив ярим ҳимоячисининг чақирув олмаганини бошқача изоҳлаш имконсиз.

Иброҳим Йўлдошев - Жуда яқин келажак

"Навбаҳор" сафида ўзининг универсаллиги билан кўзга ташланган ҳимоячи анчадан бери мутахассислар эътибор марказида турибди. Иброҳим қанотда ҳам, марказда ҳам бирдек фаол бўлибгина қолмай, яхши старт тезликка эга. Қўшимчасига, стандарт вазиятларда ҳам анча фаол. Йўлдошев иккинчи қаватдаги курашлар билан биргаликда, тўғри жой танлаш борасида ҳам анча ишончли. Унинг таркибда бўлиши, исталган мураббий учун қўшимча имконият тақдим этади. Катта эҳтимол билан Иброҳимнинг термадан таклиф олиши (шу темпда ўсишда давом этса) вақт масаласи, холос.

Умар Адҳамзода - Айни пайти!

"Нефтчи"нинг чинакам моторига айланган қанот ҳимоячиси жорий мавсум кашфиётларидан бири бўлиб тургани рост. Тезлиги юқори, жисмонан 90 дақиқа юқори темпда ҳаракат қилишга қодир фулбэк Левченконинг тезкор қарши ҳужумларидаги асосий қуролга айланиб улгурди. Тўғриси, якуний рўйхатни кўрганимда биринчи излаган футболчим айнан Умар Адҳамзода бўлди. Эътиборлиси, Сречко Катанец бу йиғинга биргина ўнг қанот ҳимоячиси Ҳожиакбар Алижоновни чақирган, холос. Ҳар эҳтимолга қарши ёки синаб кўриш мақсадида Адҳамзодани кўриб олиш учун ҳозир энг қулай пайт эди, аслида. Катанецнинг ҳимоядан қурилган футболи майдонда катта ҳажмдаги ишни бажарадиган Умар Адҳамзода учун ҳар томондан қулай. Воқеалар шу ривожда давом этса, тез орада "йўлбарслар" аъзоси ҳам термадаги дебютини нишонлаши мумкин. Сизнингча, у ҳозир Ҳожиакбар Алижонов билан рақобат қилишга тайёрми? Фикрингизни изоҳларда ёзиб қолдиринг.

Яҳёхўжа Улуғхўжаев