"Катанецнинг фикрига қўшиламан, Эронда ҳатто ҳимоячи ҳам майдонга гол ураман, деб тушади" - Азиз Амонов Намангандаги турнир ва "Истиқлол"даги фаолияти ҳақида интервью берди

Эроннинг “Истиқлол” клубида тўп сураётган легионеримиз Азиз Амонов ҳам Наманганда ташкил этилган “Navruz Cup-2022” халқаро турнирида иштирок этди.

Иқтидорли футболчига Сречко Катанец катта ишонч билдираётгани кўриниб турибди. Амонов куни кеча Sports.uz сайти учун интервью берди.

- Азизбек, Наманганда ташкил этилган мусобақадан қандай таассуротлар қолди?

- Худога шукр, финал яхши ўтди. Ўз уйимизда ўйнаётганимизни билардик. Мухлислар олдида юзимиз ёруғ бўлиши учун бор кучимиз билан ҳаракат қилдик. Рақибга доим прессинг қўллаб, ўз майдонимизда ўйнаётганимизни кўрсатмоқчи бўлдик ва чиройли ўйин билан ишқибозларимизни хурсанд қилишни истадик. Голларга бой ўйин бўлди ва мана шундай учрашувни ғалаба билан тугатдик. Шунингдек, наманганликларга ташкилотчилик учун раҳмат айтмоқчиман.

- Қирғизистонни 3:1, Угандани 4:2 ҳисобларида мағлуб этдик. Биз учун муносиб рақиблармиди?

- Тўғрисини айтаман, ҳозир ҳамма футбол ўйнашни ўрганган. Масалан, Швеция билан ўйнаб, 1:2 ҳисобида ютқазган бўлсак ҳам ҳамма кўрсатган ўйинимиз учун бизни мақтади. Қирғизистонни 3:1 га ютдик, аммо кўпчилик норози. Нимага? Билмайман. Аммо ҳамма ҳам футбол ўйнай олади. Футбол йилдан-йилга ўсяпти. Энди кучсиз рақибнинг ўзи йўқ. Кучли рақиблар ҳам ютқазиб қўйяпти. Мисол учун, олдинги Туркманистон билан ҳозирги Туркманистоннинг фарқи катта. Масалан, Уганда ҳам ўз ўйини билан қандай савиядаги рақиб эканини кўрсатди. Футболда рақиб танлаш нотўғри, деб ўйлайман. Ҳар қандай ҳолатда ҳам барча рақибни ҳурмат қилиб, майдонга тушишимиз керак.

- Ҳужумчи эканингизни биламиз. Намангандаги турнирда Элдор Шомуродов бир ўйинда учта, Игорь Сергеев эса иккита гол урди. Сиз ҳужумчи ортидан ўйнадингиз ва голларга ассистентлик ҳам қилганингизни кўрдик. Ўзингиз ҳам яққол ҳужумчи сифатида тўп суришни хоҳлаяпсизми?

- Олдин ҳам соф ҳужумчи бўлмаганман. Шу пайтгача мени қайси позицияга қўйса, мураббийнинг кўрсатмасини амалда бажаришга ҳаракат қилиб келганман. Футбол жамоавий ўйин. Жамоадошларим менга шунақа имконият яратиб беришди ва мен буни давом эттирдим. Голларга ассистентлик қилганимда биргина менинг эмас, жамоадошларимнинг ҳам ҳиссалари бор.

- Ўтган вақт давомида Сречко Катанецни қанчалик тушуниб олдинглар? Жамоадан асосан нимани талаб қиляпти?

- Барчаси жойида. Тўғри, бошида ҳамма мураббийни ҳам тушуниш бироз қийин бўлади. Чунки ҳар хил нарсаларни талаб қилиши мумкин. Худога шукр, анча вақт ўтиб, футболчилар тушуниб қолишди. Ўйинимизга қарасангиз, турли услубларда ўйнатяпти. Бу ҳам яхши ҳолат. Тактикага эътибор қаратиши, ҳаммани ўз жойида ўйнаши ва ўзига юклатилган вазифани бажаришни талаб қиляпти. Ҳозирги замонавий футболнинг талаби ҳам шундай.

- Катанец Угандага қарши ўйиндан олдин бу мен учун финал эмас, оддий бир ўртоқлик учрашуви, деб айтди. Сиз учун қандай ўйин бўлди?

- Мураббийни фикрига қўшилган бўлардим. Биз асосан мухлислар учун ўйнаймиз. Уларни хурсанд қилишга ҳаракат қилдик ва рақибга очиқ футбол таклиф қилдик. Агар Осиё чемпионатида ўйнаб нимагадир эришсак, мураббий буни натижа, деб айтса бўлади. Шу боис, Катанецнинг фикрига қўшилган бўлардим. Бу ўртоқлик учрашуви ва ишқибозларни хурсанд қилиш учун ўйнадик.

- Терма жамоамиз Намангандаги турнирдан қандай фойда олди, деб ўйлайсиз?

- Ҳамма йиғиндан бир нима ўрганасиз. Жамоа янада мукаммаллашиб бораверади. Ўйиндан-ўйинга бир-бирини тушуниш ва ҳис қилиш ижобийлашиб боради ва бу яхши ҳолат.

- Эроннинг “Истиқлол” клубидаги фаолиятингизни ҳам кузатиб боряпмиз. У ердаги ҳаётингиз қандай? Клубга тўлиқ мослашиб олдингизми?

- Худога шукр, қўлимдан келганича ҳаракат қиляпман. Ўзбек футболининг мавқеини кўтариш ва ўйинчиларимиз борасида ижобий фикр қолдириш учун ҳам қўлимдан келганича ўзимни кўрсатишга интиляпман. Ҳар бир легионеримиз хорижда ўзбек футболи шаънини ҳимоя қилади. Жамоамга мослашиб олганман, ҳаммаси яхши, хазилкаш. Ички муҳит ажойиб даражада. Мухлисларини гапирмаса ҳам бўлади.

- Машҳур “Озоди” стадионида тўп суряпсиз ва у ердаги муҳитни ўз кўзингиз билан кўряпсиз...

- “Персеполис”га қарши дербида ўйнадик. Европада мухлисларнинг жўшқин шижоатини кўз ўнгимда “Озоди” стадионида кўрдим. 90 дақиқа давомида тинмади. Ўйин бошидан охиригача фақат битта клубни қўллаб-қувватлаш, бу жуда бошқача.

- Эронликлар сиздан тинмай гол талаб қилишаётгандир?!

- Улар ҳамма ўйинчидан яхши ўйин ва гол кутишади. Албатта, ҳамма футболчи, ҳатто ҳимоячи ҳам гол ураман, деб майдонга тушади.

- Яъни, бу борада босим бўлмаяптими?

- Босим бўлади, бу нормал ҳолат. Масалан, сизни ишингизда ҳам шунақа бўлади. Ҳар бир ишни ўзига яраша босими бор.

- Клубдаги яқин дўстингиз ким?

- Барчаси билан муносабатим яхши. Инглиз тилини ўрганишга ҳаракат қиляпман. Футболчилар билан алоқаларим ажойиб. Ҳурмат қилишади.