Kazemiro: "Hozirgi avlod statistikaga ortiqcha berilib ketgan"

Kazemiro zamonaviy futbolda statistikaga ortiqcha eʼtibor qaratilayotgani haqida fikr bildirdi.

"Manchester Yunayted" yarim himoyachisi Rio Ferdinandning YouTube kanalida shunday dedi:

"Hozirgi avlod statistikaga juda bogʻlanib qolgan. "Uning aniq uzatmalari 97 foiz". Lekin bu qanday paslar? Orqaga, keyin yana orqaga — bunday uzatmalar hech narsa bermaydi. Oldinga oʻynash kerak".

Braziliyalik futbolchi jamoa sardori Brunu Fernandesni ham yuqori baholadi.

"Menga Brunu juda yoqadi. U doim oldinga oʻynaydi. “Menga boʻsh hudud bersangiz, sizga muammo tugʻdiraman”, degandek harakat qiladi. Ha, baʼzida shu sababli toʻp yoʻqotadi, ammo u har doim hujum haqida oʻylaydi. Doim oldinga pas beradi va muntazam assist amalga oshiradi", — dedi Kazemiro.

Maʼlumot uchun, Fernandes joriy mavsumda 35 ta oʻyinda 8 ta gol va 21 ta golli uzatma muallifi boʻlgan.