Каземиро: "Ҳозирги авлод статистикага ортиқча берилиб кетган"

Каземиро замонавий футболда статистикага ортиқча эътибор қаратилаётгани ҳақида фикр билдирди.

"Манчестер Юнайтед" ярим ҳимоячиси Рио Фердинанднинг YouTube каналида шундай деди:

"Ҳозирги авлод статистикага жуда боғланиб қолган. "Унинг аниқ узатмалари 97 фоиз". Лекин бу қандай паслар? Орқага, кейин яна орқага — бундай узатмалар ҳеч нарса бермайди. Олдинга ўйнаш керак".

Бразилиялик футболчи жамоа сардори Бруну Фернандешни ҳам юқори баҳолади.

"Менга Бруну жуда ёқади. У доим олдинга ўйнайди. “Менга бўш ҳудуд берсангиз, сизга муаммо туғдираман”, дегандек ҳаракат қилади. Ҳа, баъзида шу сабабли тўп йўқотади, аммо у ҳар доим ҳужум ҳақида ўйлайди. Доим олдинга пас беради ва мунтазам ассист амалга оширади", — деди Каземиро.

Маълумот учун, Фернандеш жорий мавсумда 35 та ўйинда 8 та гол ва 21 та голли узатма муаллифи бўлган.