Кеча “Ливерпуль” билан хайрлашган юлдуз бир кунда жамоа топди

“Ливерпуль” ҳимоячиси Эндрю Робертсон Англия Премьер-лигасининг 38-турида жамоа мухлислари билан хайрлашган эди.

Тажрибали футболчи бир кундан кейин фаолиятини Лондоннинг “Тоттенхэм” клубида давом эттириши ҳақида маълумот чиқди. Бу ҳақда инсайдер Николо Скира хабар берди.

Манбага кўра, трансфер тўлиқ келишилган ва якунланган. Шотландиялик футболчи 2028 йил ёзигача мўлжалланган шартнома имзолаган.

Робертсон “Тоттенхэм”га эркин агент сифатида ўтади, чунки унинг “Ливерпуль” билан амалдаги шартномаси 30 июнь куни тўлиқ тугайди.

Эндрю Робертсон 2017 йилда “Халл Сити”дан “Ливерпуль”га 9 миллион евро эвазига трансфер қилинган эди. У мерсисайдликлар сафида барча мусобақаларда 378 та ўйин ўтказиб, 14 та гол ва 69 та голли узатма амалга оширган. Transfermarkt портали ҳимоячининг бозор қийматини 10 миллион евро деб баҳоламоқда.