Кейн "Бавария" билан шартномани узайтиришга тайёр

"Бавария" ҳужумчиси Ҳарри Кейн АПЛ қайтиш эҳтимоли жуда камлигини маълум қилди. Унга кўра, мюнхенликлар билан амалдаги шартномасини узайтириш имкони бўлса, у буни амалга оширишга тайёр.

"Албатта, “Бавария” билан шартномамни узайтиришим мумкин. Бу ҳақда ҳали клуб билан гаплашмадим, аммо имконият бўлса, раҳбарият билан суҳбатга тайёрман. Ҳаммаси келгуси йил қандай ўтишига ва биргаликда нималарга эришишимизга боғлиқ. Биз ҳозир ажойиб ҳолатдамиз ва мен бошқа ҳеч нарсани ўйлаётганим йўқ. Премьер-лигага қайтиш ҳақида аниқ айта олмайман. Агар “Бавария”га янги келган пайтимда сўрасангиз, қайтиб кетишимни айтган бўлардим. Энди эса бу истак бироз сўнди."

"Мен ҳозир барча эътиборимни “Бавария”га қаратганман. Агар шартномани узайтириш ҳақида гап бўлса, кўрамиз. Лекин менда ҳали бу мавсум ва кейинги мавсум бор. Бу менинг фаолиятимнинг сўнгги йили эмас, шунинг учун ваҳима қилишнинг ҳожати йўқ. Мен хотиржамман, бош мураббий Винсент Компанӣ менга ишонмоқда. Биз яхшиланган сари, мен ҳам яхшиланаётганимдан ва совринларни ютаётганимиздан хурсандман," — деди футболчи.