Килиан Мбаппе "Ювентус"га қарши ўйинда майдонга тушиши мумкин

"Реал Мадрид" Клублар ўртасидаги Жаҳон чемпионати 1/8 финалида Туриннинг "Ювентус" жамоасига қарши баҳс олиб боради. Учрашув арафасида мадридликлар учун муҳим янгилик маълум қилинди — ҳужумчи Килиан Мбаппе сафга қайтиши мумкин.

Француз футболчиси гуруҳ босқичини тўлиқ ўтказиб юборганди. Бунга гастроэнтерит ташхиси сабаб бўлган.

"Қироллик клуби" бош мураббийи Хаби Алонсо Мбаппе ҳолати ҳақида қуйидагича фикр билдирди:

"Ҳозир Килианнинг аҳволи яхши. Биз ҳар куни у билан мулоқотдамиз. Яна бир бор суҳбатлашиб, сўнгги қарорни қабул қиламиз. Унинг майдонга тушиши эҳтимоли жуда юқори. Қанча дақиқа ўйнаши мумкинлигини аниқ айта олмайман, лекин унинг дебюти учун яхши имконият бор" — дея таъриф бериб ўтди испаниялик мутахассис Мбаппенинг майдонга тушиши ҳақида. 
 
Эслатиб ўтамиз, бўлажак беллашув бугун Тошкент вақти билан 00:00 да старт олиши режалаштирилган.