Кимдадир бор, кимдадир йўқ ёхуд про лигада қайси легионерлар рўйхатдан ўтганини биласизми?

Кузатаётган бўлсангиз, про лигага эътибор анча ортди. Айниқса, Суперлигадан қайтган жамоаларнинг про лигадаги интригани қиздиришига ишонса бўлади. Негаки, уларнинг таркиблари ҳам шунга яраша кучайтирилган.

Бу борада гап кетар экан, легионерлар масаласи алоҳида мавзуга айланади. Про лига клублари ҳам хорижлик ўйинчиларнинг хизматидан фойдаланишяпти. Албатта, ҳаммаси ҳам эмас. У ерда 11 та клуб бўлса, шундан 4 тасида легионерлар бор. Қуйида шу хусусида сўз юритамиз.

“Локомотив”

Самуэль Опех (Нигерия)

Манучехр Сафаров, Рустам Соиров (иккиси - Тожикистон)

Иван Соловьёв (Россия)

Боян Найденов (Македония)

Шиме Жужул (Хорватия)

Сир эмаски, ўтган йили Суперлигани тарк этган “Локомотив” муваффақиятсизлигидан тушкунликка тушмади. Аксинча, қайтанга янгича руҳланиб, ўзгача иштиёқ пайдо бўлгандек. Клуб ҳаммасини яна бошидан бошлашга киришди. Шу йилнинг ўзидаёқ “Локомотив” Суперлигага қайтмоқчи ва бу йўлда “темирйўлчилар” про лиганинг биринчи рақамли фаворити. Таркиби ҳам шунга мос равишда тажрибали ўйинчилар билан бойитилди. Про лига клублари орасида иккита клуб легионерлар лимитидан тўлиқ фойдаланди ва улардан бири “Локомотив”. Ўтган йилги легионерлардан нигериялик Самуэль Опех билан тожикистонлик Манучехр Сафаров таркибда сақлаб қолинди. Уларнинг ёнига 4 нафар хорижлик футболчи қўшилди. Сафаровнинг юртдоши Рустам Соиров, россиялик Иван Соловьёв, македониялик Боян Найденов ва хорватиялик Шиму Жужул “Локо” билан шартнома имзоладилар. Уларнинг орасида Соловьёв билан Найденов мухлисларимизга яхши таниш. Бунгача “Навбаҳор” ва “Насаф”да ҳам ҳам тўп суришганлигини билсангиз керак. “Локомотив” мазкур легионерларнинг ҳисобига ҳам анча кучайишга эришди. Дарвоқе, илк турда Жужул дублга эришди ва тожикистонлик Сафаров ҳам голлари ҳисобини очди.

“Хоразм”

Невилле Мбанвей Тенгег (Камерун)

Урганчнинг “Хоразм” жамоаси таркибидан фақат бир нафар легионер ўрин олди. Бу – камерунлик ҳужумчи Мбанвей Тенгег. Ўтган йили камерунлик бошқа ҳужумчи Роки Марчиано чинакам топилмага айланди ва про лигада тўпурарлик салоҳиятини намойиш қила олди. “Хоразм”да кашф қилинган легионерга “совчи”лар кўпайиб қолганди. Натижада у фаолиятини БАА чемпионатида давом эттирадиган бўлди ва бу унинг учун олдинга ташланган қадам бўлди. Бунда эса “Хоразм” Марчиано учун трамплин вазифасини бажарди. Шунинг учун бўлса керак, урганчликлар бу сафар ҳам яна Камерундан ўйинчи излашди ва янги ҳужумчини топишди. Кўриниб турибдики, Тенгегни ҳам Марчиано каби кашф қилишмоқчи...

“Динамо”

Юдаи Коике (Япония)

Евгений Назаров (Россия)

Францис Нарх, Деррих Едия Менсах, Жоел Кожо (барчаси – Гана)

Элгужа Григалашвили (Грузия)

Самарқанднинг “Динамо”си “Локомотив” каби легионерлар хизматидан тўлиқ фойдаланди. Бош мураббий Вадим Абрамов бошчилигидаги “Динамо” про лигага равона бўлди ва энди ўша мураббийнинг ўзи клубни Суперлигага қайтаришни мақсад қилган. Ҳар ҳолда у ҳам ишлаган пайтида “Динамо”ни тушириб юборган деган тамға бўлишини хоҳламайди. Таркибини кутилганидек янги ижрочилар билан кучайтирди. 6 нафари легионерлар. 2022 йилги таркибдан грузиялик Элгужа Григалашвили “Динамо”да қолди. Бунинг устига бу футболчининг самарқандликлар билан амалда шартномаси бор. Абрамов уч нафар ганалик янги ўйинчини олиб келди. Қолаверса, япониялик ва россиялик футболчиларни ҳам “Динамо”да тўп суришга кўндирди. Клубдаги легионерлар орасида Григалашвилидан ташқари ганалик Францис Нарх ҳам ишқибозларга жуда яхши таниш. Боиси, бунгача у ўтган мавсумда “Бунёдкор”да ўйнади. Аслида бу йигитга Суперлигадан ҳам чорловлар бўлганди, аммо Вадим Абрамов эпчиллик қилиб, Нархга яхши нарх белгилаб жамоасига олиб кела олди. Кўриниб турибдики, “Динамо”да легионерлар жамоанинг асосий кучига айланмоқда. Буни дастлабки учрашувлардаёқ кўрсатишмоқда. Масалан, илк турда “Машъал” дарвозасига Кожо (дубль) ва Григалашвилининг урган голи эвазига “Динамо” уч очкони қўлга киритди. Айтиш мумкинки, улар клубга фойда келтиришни бошлашди.

“Машъал”

Отар Жавашвили, Андро Гиоргадзе, Шота Гвазава (барчаси – Грузия)

Сергей Петров (Украина)

“Машъал” бошқа етакчилардан фарқли ўлароқ чемпионатни иккита мағлубият билан бошлади. Аввалига ўз уйида “Динамо”га 1:3, Қўқонда “Қўқон-1912”га 1:0 ҳисобида мағлубиятга учради. Одатда, “Машъал” доим легионерлар хизматидан фойдаланиб келади. Бу сафар ҳам анъанасидан чекинмади. Фақат легионерларини тез-тез алмаштириб туради. Янги мавсум учун айниқса Грузиядан уч нафар футболчи таклиф қилинди. Булар – Жавашвили (ҳимоячи), Гиоргадзе (ҳимоячи) ҳамда Гвазава (ярим ҳимоячи). Украинадан эса Петров (ҳужумчи). Аммо шу Петров дисквалификация сабабли дастлабки баҳсларда “Машъал”га ёрдам бера олмади. Шота Гвазава эса 2-турда Қўқондаги беллашувнинг 73-дақиқасида қизил карточка олиб майдонни тарк этди ҳамда жамоасини қийин аҳволга солиб қўйди. Кейинги учрашувларда легионерлар “Машъал”га қанчалик ёрдам бера олишини кузатамиз.

Хуллас, ҳаммаси бўлиб 17 нафар легионер рўйхатдан ўтказилган. Юқоридаги клубларгина легионерларига эга бўлди. Бошқа жамоалар, айтайлик Суперлига йўлида курашаётган “Қўқон-1912” хорижлик футболчиларнинг хизматидан фойдаланмасдан олдига қўйилган мақсадни маҳаллий ўйинчилар билан амалга оширишни лозим топдилар. Қолаверса, “Шўртан”, “Ғиждувон”, “Юниред”, “Андижон-SGS”, “Арал” ҳамда “Навбаҳор-фарм” ҳам асосан маҳаллий футболчилардан ташкил топди.

Шуҳратбек Жўраев.