Клопп Муҳаммад Салоҳнинг кетиши ҳақида гапирди

Оммавий ахборот воситаларида “Ливерпуль” ҳужумчиси Муҳаммад Салоҳ фаолиятини Саудия Арабистонида давом эттириши мумкинлиги ҳақидаги хабарлар тобора кўпайиб бормоқда.

Бунга жамоа бош мураббийи Юрген Клопп муносабат билдирди.

- Муҳаммад менга ҳеч қачон кетишни истаётгани ҳақида гапирмаган. Шунинг учун мен ҳам бу ҳақида умуман ўйламаганман. Бошқа гапдан хабарим йўқ. Муҳими, Салоҳ ҳозир биз билан, - деди Юрген Клопп.

Матбуотда Саудия Арабистонининг “Ал-Иттиҳод” клуби мисрлик форвард учун 200 миллион евро тикишга тайёрлиги ва ўйинчининг ўзига катта маош таклиф қилаётгани ҳақида маълумотлар тарқатиляпти.

Муҳаммад Салоҳ “Ливерпуль”да 2017 йилдан бери тўп тепмоқда. 31 ёшли футболчининг амалдаги шартномаси 2025 йилнинг ёзида якунланади.