Клоппга АҚШ ва Англия термалари таклиф билан чиққан

Юрген Клоппнинг агенти Марк Косицке немис мураббийининг фаолиятини давом эттириш бўйича қандай вариантлар бўлгани ҳақида гапирди.

Маълум қилишича, Клопп "Red Bull" тизимига ўтишидан олдин бир қатор жиддий таклифларга эга бўлган. У АҚШ ёки Англия терма жамоаларини бошқариши мумкин эди. Шунингдек, агар Юлиан Нагельсманн лавозимда бўлмаганида, Германия термасини ҳам қабул қилиши эҳтимолдан холи эмас эди.

Бундан ташқари, "Челси" ва "Манчестер Юнайтед" ҳам Клоппга қизиқиш билдирган. Гарчи мураббий Англияда бошқа клубни бошқармаслигини очиқ айтган бўлса-да, бундай таклифлар тўхтаб қолмаган.

Клопп "Ливерпуль"ни 2015 йил октябридан 2024 йил майигача бошқарди. Унинг қўл остида “қизиллар” узоқ йиллик танаффусдан сўнг Англия чемпионига айланди, Чемпионлар лигаси финалига уч марта чиқди ва бир бор ушбу мусобақада ғолиб бўлди.