Клуб хўжайини “Тоттенхэм”дан 27 миллион фунт олиб кетди

“Тоттенхэм” Даниэл Левини клуб президенти лавозимидан озод этиш учун 27 миллион фунт тўлашга мажбур бўлди.

Эслатиб ўтамиз, Леви 24 йиллик фаолиятидан сўнг 2025 йил сентябрь ойида “Тоттенхэм”ни тарк этган. “Шпорлар”нинг энг йирик акциядори бўлган Льюис оиласи клуб бошқарувини ўз қўлига олишга қарор қилган.

The Athletic маълумотига кўра, Леви билан хайрлашиш “Тоттенхэм” бюджетига жиддий зарба бўлган. 27 миллион фунтлик компенсация Даниэлнинг маоши, ишлаган йиллари учун бонуслари ва клубнинг узоқ муддатли рағбатлантириш дастури доирасида унга тўланиши керак бўлган маблағлардан ташкил топган.

Шу билан бирга, Леви “Тоттенхэм”нинг 20 фоиздан ортиқ улушига эга ҳаммуассис-акциядор бўлиб қолмоқда. Льюис оиласи клуб капиталига 320 миллион фунт киритганидан сўнг, Даниэл бу жараёнда иштирок этишдан бош тортган ва натижада унинг улуши бироз камайган.

Қайд этиш жоизки, бу Премьер-лига клублари раҳбарларини ишдан бўшатиш учун тўланган энг йирик компенсациялардан бири ҳисобланади. Бироқ бу сумма Марина Грановская 2022 йилда “Челси”ни тарк этганида олган 35 миллион фунтлик компенсациядан кам.