“Komo” rahbarlari “aristokratlar” fikrini pul bilan o‘zgartirmoqchi

Italiya chempionatining kashfiyotlaridan hisoblangan “Komo” jamoasi kelasi mavsum Yevropa Chempionlar ligasida ishtirok etadi. Klub qit’aning eng nufuzli musobaqasidagi debut mavsumidan oldin tarkibini kuchaytirishga harakat qilayapti.

“Komo” himoya chizig’ini mustahkamlash maqsadida “Chelsi”dan Trevo Chalobani so’rab, rad javobini olgan edi. Endi italyaliklar tajribali himoyachi bo’yicha “aristokratlar”ga navbatdagi taklifni tayyorlamoqda.

Sky Sports xabariga ko’ra, avvalroq londonliklar 25 million yevro miqdoridagi taklifni qabul qilmagan. Bu gal “Komo” 30 million yevro hamda qo’shimcha 5 million yevro bonus taklif qilishga tayyor.

Futbolchiga Milaning “Inter” klubi ham jiddiy qiziqish bildirmoqda.

Chaloba o’tgan mavsumda “Chelsi” safida barcha musobaqalarda 47 ta uchrashuvda ishtirok etib, 3 ta gol urdi. Transfermarkt portali uning bozor qiymatini 40 million yevroga baholamoqda. Ayni paytda himoyachi Angliya terma jamoasi bilan jahon chempionatida ishtirok etmoqda.