Konor Makgregor o‘zi jangni bekor qilgan turnir haqida gapirdi

Ikki vazn toifasida (-66 kg va -70 kg) sobiq chempioni irlandiyalik Konor Makgregor UFC 303 turnirini tomosha qilishda qiynalayotganini aytdi.

“Mensiz o‘tayotgan turnirni tomosha qilish yoqimli desam, yolg‘on gapirgan bo‘laman. Bu yurak og‘rig‘i. Qo‘llab-quvvatlagan, dalda bergan hamkasblarim va muxlislarimga rahmat”, — deb yozdi Konor o‘zining ijtimoiy tarmoqlardagi sahifasida.

Eslatib o‘tamiz, dastlab UFC 303 turniridagi asosiy jang Konor Makgregor va UFC’ning sobiq chempioni amerikalik Maykl Chendler o‘rtasida kechishi kerak edi. Biroq irlandiyalik jangchi tayyorgarlik vaqtida chap oyog‘ining kichkina barmog‘ini sindirib olgani uchun bahsni bekor qilishga majbur bo‘ldi.

Ma’lumot uchun, UFC 303 turniri 29 iyundan 30 iyunga o‘tar kechasi Nevada shtati Las-Vegas shahridagi «T-Mobile Arena» majmuasida bo‘lib o‘tadi.