Коньядаги Ислом бирдамлик ўйинларида вакилларимиз 23 та спорт туридан иштирок этади

2017 йилнинг 12-17-май кунлари ўтказилган IV Ислом бирдамлик ўйинларида ўзбекистонлик спортчилар илк маротаба иштирок этган эди. Бокудаги ушбу мусобақада Ўзбекистон делегацияси 100 нафар спортчи билан қатнашган.

Эътиборлиси, иштирокчилар орасидан таниқли спортчилар, хусусан Олимпия ўйинларида қатнашиш бўйича дунё рекордчиси Оксана Чусовитина ва Рио-2016 олимпиадаси совриндори Ихтиёр Наврўзов ҳам жой олган эди.

Бу ўзбекистонлик спортчилар учун Рио олимпиадасидан кейинги илк йирик турнир эди. Ҳамюртларимиз бокс, дзюдо, таеквандо, эркин кураш, юнон-рум кураши, оғир атлетика, бадиий ва спорт гимнастикаси, теннис каби спорт турларида иштирок этиб, жами 63 та медал билан кучли бешликдан жой олган.

Эътироф этиш жоиз, мусобақада дебют қилган жамоамиз учун бу катта натижа ҳисобланади.

2021 йил Туркиянинг Конья шаҳрида ўтиши белгиланган V Ислом бирдамлик ўйинлари эса пандемия сабаб қолдирилган эди. Эндиликда, Ислом бирдамлик ўйинларининг нуфузи йилдан йилга ошиб бормоқда. Мисол тариқасида, Боку-2017га 20та спорт тури киритилган бўлса, КОНЯ-2021 ўйинларида спортнинг 23 тури бўйича мусобақалар ташкил этилади. Улар орасида Олимпия, паралимпия ва ноолимпия спорт турлари ҳам бор. Айни дамда Коняда спортчилар, журналистлар ва мухлислар хавфсизлигини таъминлаш ва қулайликлар яратиш учун тайёргарлик жараёнлари қизғин давом этмоқда.

Ҳозирда спортчиларнинг жисмоний ҳолатини яхшилаш ва тайёргарликни юқори босқичга олиб чиқиш, юқори натижалар қайд этиш, мусобақани ОАВда кенг ёритиш борасида тизимли ишлар амалга оширилмоқда.

V Ислом бирдамлик ўйинларида вакилларимиз сузиш, камондан отиш, енгил атлетика, баскетбол, қиличбозлик, бадиий гимнастика, спорт гимнастикаси, гандбол, дзюдо, стенддан ўқ отиш, стол тенниси, таеквандо, оғир атлетика, эркин кураш, юнон-рум кураши, кикбоксинг, карате, анъанавий турк камони, пара стол тенниси, пара камондан отиш, пара сузиш, пара енгил атлетика каби спорт турларидан иштирок этишади. Делегациямиз таркибидан ўрин олган спортчиларга ушбу ўйинларда юксак натижаларни қўлга киритишида омад тилаймиз.

Маълумот учун: 2025 йилги VI Ислом бирдамлик ўйинлари Камерун давлатида ўтказилади.