"Ковентри" Лэмпард бошчилигида 25 йилдан сўнг АПЛга чиқди

"Ковентри" Фрэнк Лэмпард раҳбарлигида 25 йиллик танаффусдан сўнг Англия Премьер-лигасига йўл олди. Жамоа сўнгги бор 2001 йилда элита дивизионида иштирок этган эди.

Лэмпард бошчилигидаги жамоа муддатидан аввал АПЛ йўлланмасини нақд қилди. Қизиғи шундаки, мутахассис "Ковентри"га келган пайтда жамоа Чемпионшип жадвалида атиги 17-ўринда бораётган эди. Бор-йўғи 1,5 йил ичида у 25 йилдан бери олий лигада ўйнамаган клубни АПЛга олиб чиқишга муваффақ бўлди.

Жамоанинг бу муваффақиятида айнан Лэмпарднинг ҳиссаси катта бўлгани таъкидланмоқда. Мутахассис ва клуб ўртасидаги ҳамкорлик кутилганидан ҳам самарали чиқди.

Шу билан бирга, оммавий ахборот воситаларида Лэмпардга "Челси" томонидан қизиқиш борлиги ҳақида хабарлар пайдо бўлмоқда. Қайд этилишича, агар лондонликлар расмий таклиф билан чиқса, мураббий рад этиши қийин бўлиши мумкин.

Ҳозирча эса "Ковентри" Чемпионшипда чемпионлик сари ишончли одимламоқда — жамоа иккинчи ўриндан 11 очко фарқ билан илгарилаб кетган.