"Кристал Пэлас" "Манчестер Сити" ҳимоячисини олишга киришди

"Кристал Пэлас" ёзги трансферлар ойнасида фақат икки футболчини олишга улгурди — дарвозабон Уолтер Бенитес ва ҳимоячи Борна Сосa. Шу билан бирга, жамоа етакчиси Эберечи Эзе "Арсенал"га 67,5 млн евро эвазига кетди, Марк Гехининг ҳам сотилиши эҳтимоли бор.

"SunSport" нашрининг хабарига кўра, Оливер Гласнер ёзги трансферлар ёпилишидан олдин катта "трансфер"ни режалаштирмоқда. "Пэлас" 30 ёшли "шаҳарликлар" ҳимоячиси Мануэль Аканжи учун расмий таклиф йўллади. Таклиф 15 млн фунт ва бонусларни ўз ичига олган.

Аканжи ўтган мавсумда манчестерликлар сафида 40 ўйинда иштирок этиб, 2 та голли узатма амалга оширди. У 2022 йилда "Боруссия Дортмунд"дан "Сити"га келгандан буён жами 136 ўйинда 5 та гол ва 3 та ассист қайд этган.

Швейцария терма жамоаси ҳимоячиси икки марта Премьер-лига чемпиони бўлган. У "Пэлас"дан кетиши мумкин бўлган Марк Гехининг ўрнини босиши кутилмоқда.