Кукурелья Жаҳон чемпионати олдидан уйқу муаммосини енгганини айтди

Испания терма жамоаси ва "Челси" ҳимоячиси Марк Кукурелья Жаҳон чемпионати бошланиши арафасида янги вақт минтақасига мослашиш жараёни ҳақида гапирди.

Футболчининг таъкидлашича, дастлаб уйқу билан боғлиқ қийинчиликлар бўлган, аммо ҳозир вазият тўлиқ яхшиланган.

"Аввалига осон бўлмади, аммо сўнгги бир неча кундан бери жуда яхши ухлаяпман. Кечқурун кеч ётмаслик учун кундузи узоқ ухламасликка ҳаракат қиламиз. Ҳозир бутун тун давомида уйғонмасдан ухлаяпман", — деди Кукурелья.

Испания терма жамоаси Жаҳон чемпионатидаги иштирокини Кабо-Верде терма жамоасига қарши ўйин билан бошлайди. Африка вакили ўз тарихида илк бор мундиалда қатнашмоқда.

Учрашув 15 июнь куни Атланта шаҳрида бўлиб ўтади.