Куман катта гапириб қўйди, энди буни исботлаш керак

“Барселона” бош мураббийи Рональд Куман клубнинг молиявий инқирозга ботиб бораётгани ва жамоа ишончли ўйин кўрсата олмаётганига қарамай, Испания чемпионатида олтин медални қўлга киритишига ишонмоқда.

- Жароҳатланган футболчиларимиз сафга қайтганидан кейин жамоа ўйинидан қониқа бошладим. Жароҳат доим бўлади ва бу борада омадимиз чопмади. Биз чемпионатда ғолиб чиқишга қодирмиз.

Одамлар келажагим ҳақида гапиришига кўникиб қолдим. Катта клубларда бу одатий ҳол. Бу биринчиси ҳам, охиргиси ҳам эмас. Ўтган мавсумда ҳам бош мураббийни муҳокама қилишган пайт бўлган. Клуб президенти мени қўллаб-қувватлаб, нохуш вазиятни бартараф қилганди. Мураббий учрашувларда натижа қилиши керак. Ўтган ишлар ҳақида гапиришни истамайман.

Бор кучимни ўйинимизни ривожлантиришга сарфлашим керак ва ҳиссиётларга берилмайман. Клуб учун энг яхши ишларни қилиш илинжидаман, - деди Рональд Куман.

Испания чемпионатида 9-ўринда бораётган “Барселона” бугун ўз майдонида “Валенсия” билан куч синашади.