Куманга керак бўлмаганлар клубдан бирин-кетин кетмоқда

Рональд Куман янги бошланган мавсумда асосий таркибдан жой берилмайдиган икки нафар ҳимоячини бошқа жамоага ўтиб кетишига рухсат берди.

Маълумотларга қараганда, Хуниор Фирпо Каталонияни тарк этиб, фаолиятини “Аталанта”да давом эттиради. Италияликлар 24 ёшли футболчини бир йил ижарага олиб, кейинчалик 18 миллион еврога сотиб олишни режалаштирмоқда.

Шунингдек, португалиялик ҳимоячи Нелсон Семеду ҳам бошқа жамоага ўтади. Аввалига бу ҳимоячига ишонч билдириб, амалдаги шартномани узайтирмоқчи бўлган клуб раҳбарияти, энди уни Англияга трансфер қилмоқчи.

26 ёшли ҳимоячига айни пайтда “Вулверхэптон” жиддий қизиқиш билдирмоқда ва бу  трансфер учун 38 миллион евро тикишга тайёрлигини маълум қилган. Семеду ушбу жамоа таркибидан “Тоттенхэм”га ўтиб кетган Мэтт Доэртининг ўрнини эгаллаши керак.

Таъкидлаш жоизки,  “Барселона” раҳбарияти бош  мураббий Рональд Куманга маъқул келмаётган бу икки футболчини сотиб юборишга қаршилик қилмайди.

Матнда хатолик топсангиз, ўша хатони белгилаб, бизга жўнатинг (Ctrl + Enter)