Легионеримиз энди испаниялик мураббий билан ишлайди!

Россия Премьер-лигасида бу мавсум икки нафар футболчимиз иштирок этмоқда. Иброҳимхалил Йўлдошев “Нижний Новгород” жамоасини шарафини ҳимоя қилаётган бўлса, Ҳожимат Эркинов “Торпедо” жамоаси аъзоси ҳисобланади.

Ҳар икки жамоа ҳам юқори дивизион жадвалининг пастки қисмидан жой олган. Нижний новгородликлар хавфли зонадан олти очко олдинда ва катта эҳтимол билан лигадаги ўрнини сақлаб қолади.

Иброҳимхалил Йўлдошевнинг ишлари ҳам чакки эмас. У асосий таркиб ўйинчиси ҳисобланади. Премьер-лигада 18 та учрашув ўтказиб, рақиблар дарвозасини икки бор ишғол қилди ва бир марта жамоадошларига голли пас узатди. Россия кубоги доирасида олтита баҳсда майдонга тушиб, битта ассист муаллифи бўлди.

Москваликларга Премьер-лигадаги дебют мавсуми оғирлик қиляпти. “Торпедо” 20 та учрашувда иккита ғалаба ва тўртта дуранг қайд этиб, 10 очко билан сўнгги поғонани эгаллаб турибди.

Бу мавсум Ҳожимат Эркинов учун легионер сифатида биринчиси. Ҳар ҳолда ҳужумкор ёш ўйинчимиз кучли лигада йўқолиб қолгани йўқ. “Торпедо”нинг 15 та учрашувида қатнашиб, битта голли пас ҳам оширди.

“Торпедо” клуби раҳбарияти жамоани юқори дивизионда олиб қолиш мақсадида чемпионат якунланишига ўн тур қолганида бош мураббийни ўзгартиришга қарор қилди. Шу пайтгача жамоани бошқарган Андрей Талалаев истеъфога чиқарилди.

Жамоа испаниялик мутахассис Жозеп Клотетга топширилди. Бу ҳақда клуб расмий сайти эълон берди.

“Жозеп Клотет — “Торпедо Москва” футбол клуби бош мураббийи! Афсонавий клубимизда испаниялик мутахассисга омад ёр бўлишини тилаймиз!”, - деб пост қўйди “Торпедо” матбуот хизмати.

45 ёшли Жозеп Клотет профессионал даражада футбол ўйнамаган. Мураббийлик фаолиятини 2001 йилда бошлаган ва Испаниянинг  “Корнелья”, “Фигерас”, “Эспаньол” клубларида 2009 йилгача ишлаган. Кейин халқаро фаолияти бошланиб, Швециянинг “Мальмё”, “Хальмстад”, Норвегиянинг “Викинг”, Англиянинг “Суонси Сити”, “Лидс Юнайтед”, “Оксфорд Юнайтед”, “Бирмингем Сити”, Италиянинг “Брешиа” ва СПАЛ жамоалари мураббийлар штабида ишлаган ва бош мураббийлик ҳам қилган.

Клотет мураббийлик фаолияти билан журналистика соҳасида ҳам ишлайди. У Sky Sports телеканалида футбол шарҳловчиси вазифасини бажаради. Шунингдек, Испаниянинг машҳур  Marca нашрида ўз блогини юритади.

“Торпедо” раҳбарияти янги бош мураббий олдига жамоани қуйи лигага тушиб кетишдан қутқариш вазифасини юклаган. Бунинг учун испаниялик мутахассис олдида ўнта учрашув турибди. “Торпедо” 21-тур ўйинини 2 апрель куни ўтказади. Шу куни Клотет янги шогирдларини сафар баҳсда “Ростов”га қарши майдонга олиб тушади.

Шу ўринда, “Торпедо”даги легионеримиз Ҳожимат Эркинов айни пайтда жароҳатини даволатаётганини айтиб ўтиш лозим. Айнан мана шу сабабли ҳужумкор футболчимиз Ўзбекистон миллий терма жамоасининг Саудия Арабистонидаги ўқув-машғулот йиғинидан озод этилган эди.

Шомуродов ўзи билан зўр тўпурар олиб келади!