Легионеримиз шартномасини узайтирди-ю, лекин чемпионати тўхтатиб қўйилди

Бир қатор ҳамюртларимиз бошқа чемпионатларда ўз омадларини синаб кўрмоқда. Таиланд Тай-лигасида ҳам ўзбекистонлик футболчилар фаолият олиб бормоқдалар.

Ўтган йили “Муангтонг Юнайтед” сафига кўчиб ўтган Сардор Мирзаев ўтган вақт давомида жамоасида муҳим ўйинчилардан бирига айлана олди. Биринчи даврадан кейин ҳамюртимизнинг жамоаси 16 та иштирокчи орасида 22 очко билан 7-ўринда боряпти. Лекин айни пайтда у ерда чемпионат яна тўхтатилди. Бу ҳақида Сардор Мирзаев sports.uz мухбирига шундай деди: 

-  Бизда иккинчи давра бошланиши керак эди. Лекин Таиландда яна коронавирус кўпайиб кетди. 5 январдан яна карантин жорий этилди, магазинлар ёпилди. Охирги 20 кун ичида 6 мингта касал чиқди. Қизиғи, бунга қадар бир йил давомида 4 мингта касаллик аниқланганди. Охирги пайтда касаллик кўпайиб кетгани учун яна ҳамма нарса ёпилди. Шунинг ҳисобига чемпионат ҳам бир ойга тўхтатилди. Аслида март ойида тугаши  керак эди. Агар февралда рухсат берилса, ўша ойнинг ўзида 10 тача ўйинда ўйнашимизга тўғри келади ва бу борада биз Англиянинг “боксинг дэй”идан ҳам ўтиб кетамиз шекилли. Чемпионатда катта-катта шартномалар бор экан. Чунки Таиланд клублари асосан хусусий.

2020 йил якунлангач, Мирзаевнинг у ердаги кейинги тақдири қандай кечиши қизиқтираётганди. Ҳар ҳолда ўз клубида ўйинлари ва голлари билан анча эътибор қозонди. Легионер сифатида ўзини кўрсатиб келаётганди. Шу сабабли фаолиятида яна ўзгариш бўладими-йўқми, шу масалага қизиққанимизда ҳамюртимиз вазиятга ойдинлик киритди.

-  Шартномам 1+1 кўринишида тузилган. Агарда ўтган мавсумда 70 фоиздан кўпроқ учрашувларда майдонга тушсам, узайтириш масаласи кўриб чиқилиши кўзда тутилган. Шу боис улар билан ҳаммасини келишиб олдик ва шартнома узайтирилди. Тўғриси, ўзимиздан ҳеч ким билан гаплашмадим. Таиландда янада яхшироқ ўйнаб кучлироқ клубларга кетмоқчиман. Аввал карантиндан чиқиб чемпионатни тугатиб олайлик, қолганини кейин кўрамиз. Ўтган йили умумий ҳисобда 16 та учрашувда майдонга тушдим. 6 та гол урдим ва 5 та ассистентлик  қилдим. Бошида келганимда 4 та ўйинда ўйнагач, коронавирус сабабли чемпионат тўхтатиб қўйилганди. Сентябрда қайта бошланганида бироз жароҳат қийнади. Октябрдан бошлаб тўлиқ икки ой давомида барча учрашувларда иштирок этдим. Спорт формамни ҳам тиклаб олдим. Бирданига самарадорлик ошди ва 4 та голли пас бериб, 6 та гол урдим. Таиланд чемпионатига анча мослашиб кетдим.

Айни пайтда яна карантин жорий этилгани табиийки клубларнинг ҳам режаларини ўзгартириб юборади, шу жумладан, легионерларга ҳам ўз таъсирини кўрсатиши турган гап. У ерда машғулот ўтказишга рухсат борми ёки аксими? Бу хусусида Мирзаев қуйидагиларни маълум қилди:

-  Биз уйдан келиб бемалол машғулот қиляпмиз. Ҳар бир туманларни ёпишган. Биз легионерларга стадионга яқин жойдан уй беришган. Оралиқ масофа беш дақиқалик йўл. Бу ерда машғулот ўтказишга рухсат берилган. Клуб бизга машина берган, шундан фойдаланиб юрамиз. Эрталаб 10 дан кечки 5 гача шаҳарда кўп нарса очиқ. Кечки 7 дан кейин кўчада юриш мумкин эмас.