Легионеримизнинг Европа Чемпионлар лигасидаги ўйини қандай баҳоланди?
Европа Чемпионлар лигасининг янги мавсумида ҳам ўзбек футболи тарбияланувчилари иштирок этмоқда. Қозоғистоннинг амалдаги чемпиони “Ордабаси”да тўп тепаётган икки легионеримиз – Жасурбек Яхшибоев ҳамда Шаҳбоз Умаров “кўҳна қитъа”нинг энг нуфузли турнирида ўзини кўрсатиш имконига эга бўлмоқда.
Ўтган мавсумда “Ланс”даги легионеримиз Абдуқодир Ҳусанов УЕФАнинг икки йирик мусобақаси – Чемпионлар лигаси ва Европа Лигасида иккитадан беллашувда қатнашиб, бу турнирлардаги дебютини нишонлаган эди.
Ўз тарихида илк бор чемпионликни қўлга киритган “Ордабаси” Чемпионлар лигаси саралаш босқичидаги биринчи учрашувини ўз мухлислари кўз ўнгида Молдованинг “Петрокуб” жамоасига қарши ўтказди.
Икки дебютантнинг илк тўқнашуви кескин ва муросасиз курашлар остида ўтганига қарамай, ўйинда голсиз дуранг қайд этилди.
Беллашувда гол киритиш учун энг қулай вазиятга легионеримиз Жасурбек Яхшибоев эга бўлди. Биринчи бўлимда 27 ёшли ҳужумчи рақиб дарвозабони Сильвиу Шмаленя билан бирга бир вазиятга чиқиб борди. Бироқ бу вазият голкипер жамоасини голдан қутқариб қолишни уддалади.
Жасурбек Яхшибоев халқаро учрашувда тўлиқ ўйнади ва баҳс якунланиши арафасида бош ҳакам томонидан огоҳлантирилди. Яна бир легионеримиз – 25 ёшли ҳужумкор футболчи Шаҳбоз Умаров бу беллашувда захирада қолдирилди.
Ҳар икки чемпион жамоа учун ҳам тарихий аҳамият касб этган ушбу учрашувни таҳлил қилган Молдованинг moldova.sports.md сайти беллашувнинг энг яхши ўйинчиси Жасурбек Яхшибоев бўлганини алоҳида эътироф этди.
- “Петрокуб” Чемпионлар лигасининг биринчи саралаш босқичида Чимкентда “Ордабаси” клуби билан куч синашди. Хинчештиликлар жуда муносиб қаршилик кўрсатди ва рақибга ташаббусни ўз томонига оғдиришига имкон бермади. Бироқ мезбонлар ҳам ўйинда бор кучи билан ҳаракат қилди.
Қозоғистон жамоаси таркибида Жасурбек Яхшибоев фаоллиги билан алоҳида ажралиб турди. Бу ҳужумчи яқин ўтмишда ижара асосида Тирасполнинг “Шериф” жамоаси шарафини ҳимоя қилган эди, - деб ёзди moldova.sports.md сайти.
Энди “Ордабаси” футболчилари 17 июль куни “Петрокуб” майдонидаги жавоб учрашувида иштирок этади. Айнан бўлажак баҳс мусобақанинг кейинги босқичига қайси жамоа ўтишини белгилаб беради.
Эслатиб ўтамиз, бу йилдан эътиборан, етимишинчи маротаба ташкил этилаётган Чемпионлар лигаси янги форматда ўтказилмоқда.
Дастлабки учта саралаш босқичи ва плей-оффдан муваффақиятли ўтган жамоалар Чемпионлар лигасининг умумий босқичига йўлланма олади. Айнан мана шу умумий босқич аввалги форматдаги гуруҳ босқичи ўрнини эгаллади. Бу гал ушбу раунд иштирокчилари сони тўрттага кўпайтирилиб, жами 36 та жамоани ташкил қилади.
Янги мавсумда УЕФАга аъзо 55 та мамлакатдан 53 тасидан футбол жамоалари қатнашиши белгиланган. Бу йил ҳам мусобақада Лихтенштейн ва Россия вакиллари йўқ.
Икки легионеримиз Европа чемпионлар лигасида юришини бошлаяпти
Файзуллаевга Европадан таклиф бўлдими?
Икки легионеримиз Европа чемпионлар лигасида юришини бошлаяптиФайзуллаевга четдан қизиқиш бор, фақат...
Фикрлар