Левандовскининг кейинги манзили аниқ

Испаниянинг амалдаги чемпиони “Барселона” анчадан бери асосий тўпурари Роберт Левандовскининг ўрнини боса оладиган форвард қидирмоқда.

“Манчестер Юнайтед”дан трансфер қилинган Маркус Рэшфорднинг асосий амплуаси қанот ҳужумчиси бўлса-да, 27 ёшли футболчи марказий ҳужумчи вазифасини ҳам бажара олади.

Левандовскининг “Барса” билан шартномаси келаси ёз якунланади. Бир неча мавсумдан бери 36 ёшли форвардни ўз лигасига чорлаётган Саудия Арабистони клублари бу муддатни интизорлик билан кутмоқда.

Al-Riyadiyah нашрининг ёзишича, польшалик футболчи Каталониядаги фаолиятини якунлагач, Саудия Арабистони клублари билан шартнома тузиши эҳтимоли катта экан.

 Левандовскининг манфаатларини ҳимоя қилаётган агентлик вакиллари ҳам ўйинчининг Саудия Арабистонига ўтиш режаси борлигини тасдиқлади.

Якунланган мавсумда “Барселона” таркибида барча турнирларда 52 та учрашув ўтказган Левандовски рақиблар дарвозасини 42 марта ишғол қилди. Унинг каталонияликлар билан шартномаси 2026 йилнинг 30 август куни тугайди.