"Ливерпуль": Бу юлдуз учун юз миллион евродан кўп бермаймиз!

Англиянинг машҳур «Ливерпуль» клуби Кот-д’Ивуар терма жамоаси таркибида тўп суриб келаётган 19 ёшли иқтидорли ҳужумчи Ян Диомандени сотиб олиш борасида «РБ Лейпциг» билан келиша олмаяпти.

Футбол инсайдери Фабрицио Романо ижтимоий тармоқларда ёзишича, «Ливерпуль» томонидан таклиф этилган сўнгги 100 миллион евро миқдоридаги сумма немис клубини қониқтирмаган ва «РБ Лейпциг» бу таклифни рад этган. 

Шу билан бирга, «Ливерпуль» Диомандени олиш учун Бундеслига клуби талаб қилаётган 120 миллион евро миқдорида бадал пули тўлашга тайёр эмас.

Шу тарздаги мураккаб музокаралар фонида Ян Диомандени ўз сафига қўшиб олиш пойгасида «Пари Сен-Жермен» етакчи номзодга айланди. Хабарларга кўра, футболчининг ўзи ҳам Луис Энрике бошқарувидаги парижликлар жамоасига ўтиш вариантин афзал кўрмоқда.

Эслатиб ўтамиз, ўтган мавсумда Диоманде Германия Бундеслигасида 33 ўйинда майдонга тушиб, 12 та гол урди ва 9 та голли узатма амалга оширди.