“Ливерпуль” 92 миллион евролик трансферга қўл уряпти

Англия Премьер-лигасининг амалдаги ғолиби “Ливерпуль” жамоаси мавсумнинг биринчи қисмида юз берган инқироздан чиқиш учун таркибини кучли ўйинчилар билан мустаҳкамлашга ҳаракат қилмоқда.

Хусусан, “Ливерпуль” мутасаддилари жамоа марказий ҳимоячиларидан Иброҳим  Конатенинг клубдаги келажаги мавҳумлигини ва Виржил ван Дейкнинг ҳолати энг яхши даражада эмаслигини инобатга олиб, “Интер” вакили Алессандро Бастонини нишонга олди.

 Бу ҳақда Football Insider хабар бермоқда.

Манбанинг маълумотига кўра, 26 ёшли футболчининг потенциал трансфери мерсисайдликларга камида 80 миллион фунтга (92 миллион еврога яқин) тушиши мумкин. Шу билан бирга, Бастонига “Барселона” ҳам қизиқиш билдирмоқда.

Жорий мавсумда “Интер” ҳимоячиси барча турнирларда 20 та ўйинда иштирок этиб, ҳимоядаги вазифаларини бажаришдан ташқари, битта гол ва бешта голли узатмани амалга оширди.

Ўйинчининг клуб билан амалдаги меҳнат шартномаси 2028 йилнинг ёзига қадар мўлжалланган. Transfermarkt порталида тақдим этилган маълумотларга кўра, футболчининг бозор қиймати 80 миллион еврони ташкил этади.