“Ливерпуль” асосий юлдузига ўринбосар топди

Англиянинг амалдаги чемпиони “Ливерпуль” келаси мавсум олдидан таркибида жиддий ўзгаришлар қилишни режалаштириб қўйган.

Клубни ёши катта футболчилар, хусусан, жамоа сардори Виржил ван Дейк ҳам тарк этиши мумкин. Мерсисайдликлар билан 2027 йилнинг ярмигача давом этадиган шартномага эга нидерландиялик ҳимоячига ҳозирдан чорловлар бўляпти.

“Ливерпуль” спорт бўлими мутасаддилари ван Дейк ўрнига бошқа ҳимоячи топиб қўйди. Клуб Бундеслигада “РБ Лейпциг” жамоаси шарафини ҳимоя қилаётган Кастелло Люкебани олиб келмоқчи.

Бу ҳақда TeamTalk нашри ўз манбасига таяниб хабар тарқатди.

Манбага кўра, немис клуби 23 ёшли футболчини ёзда қўйиб юборишга тайёр. Шартномада 70 миллион евро миқдорида товон пули кўрсатилган. “Ливерпуль” бу трансферни тахминан 55 миллион фунтга амалга оширишни режалаштиряпти.

Transfermarkt маълумотларига кўра, Люкебанинг бозор қиймати 45 миллион еврони ташкил қилади.