"Ливерпуль" футболчилари Арнольд учун хайрлашув зиёфати уюштиришди

"Ливерпуль" футболчилари жамоадоши Трент Александр-Арнольднинг клубдан кетиши муносабати билан махсус зиёфат уюштиришди. DaveOCKOP нашрининг хабар беришича, айрим ўйинчилар "Арсенал"га қарши 2:2 ҳисобида якунланган учрашувдан сўнг Дубайга учиб кетишган.

Ушбу сафар жамоа учун фақат дам олиш эмас, балки Александр-Арнольд билан хайрлашув маросими сифатида ҳам ташкил этилган. Футболчилар, жумладан, жамоа сардори Виржил ван Дейк, денгизда яхтада ҳордиқ чиқараётган видеоларни ижтимоий тармоқларда бўлишишди.

Маълумотларга кўра, футболчилар Дубайда бир ҳафтача қолишади ва жума куни клуб базасига қайтишади. "Ливерпуль" АПЛнинг 37-турида дўшанба куни "Брайтон"га қарши ўйинда майдонга тушади.