“Ливерпуль” ҳужумчиси “Барса”га ўз хизматини таклиф қилди

“Барселона” асосий ҳужумчиси Роберт Левандовскининг карьераси охирги босқичда эканини инобатга олиб, келажакда марказий форвард вазифасини бажара оладиган ўйинчи қидиришда давом этмоқда.

Каталонияликларга Англия Премьер-лигасидан кутилмаган таклиф келди. Дарвин Нуньес “Ливерпуль”дан кетишга тайёрлигини билдириб, “Барселона”га ўз хизматларини таклиф қилди.

Жамоани Арне Слот қабул қилиб олганидан кейин уругвайлик ҳужумчининг майдондаги роли сезиларли даражада чекланди.

Дарвин ўзига бўлаётган муносабатдан норози ва ёзда жамоасини ўзгартиришга ҳаракат қилади.

Нуньес илгари Испанияда ўйнаган ва шу боис Ла Лигага қайтишни маъқул вариант сифатида кўриб чиқмоқда. У Европага келганида илк бор “Альмерия” клубида ўйнаган ва шу жамоадан “Бенфика”, Португалиядан эса, “Ливерпуль”га ўтганди.

“Барселона” президенти Жоан Лапорта Дарвин Нуньес агентларидан таклифни олди. Лекин бу масалада кўп нарса бош мураббий Ханс-Дитер Фликнинг қарорига боғлиқ бўлади.