"Ливерпуль" раҳбарияти "Лион"нинг нидерландиялик ҳужумчиси Мемфис Депай учун "Барселона" билан рақобатлашишга тайёр. Бу ҳақда Marca нашри хабар тарқатмоқда.

Юқоридаги манбага кўра, "мерсисайдликлар" мисрлик ҳужумчи Муҳаммад Салоҳнинг жамоадан кетиши ҳақида тарқалган кўплаб миш-мишлар ортидан айнан ўзининг ҳужум чизиғини кучайтиришга жиддий эътибор қаратмоқда. Аммо, АПЛ чемпиони бу борада "Барса"га қарши бўладиган жиддий рақобатга тайёр бўлиши керак. Боиси, каталонияликлар ҳам 27 ёшли Депайни ўтган йилнинг ёзидан буён таркибга қўшиб олишни режалаштириб келмоқда. Қолаверса, Депай Голландия терма жамоаси сафида “Барселона” ҳозирги бош мураббийи Рональд Куман қўл остида шуғулланган ва бу ҳам каталонияликларнинг устунлигига хизмат қилиши мумкин.

Депайнинг "Лион" билан амалдаги шартномаси 2021 йилнинг ёзида ўз ниҳоясига етади ва шу боис, у янги жамоасига эркин агент сифатида текинга бориб қўшилиши мумкин.

Мемфис жорий 2020/2021 йилги мавсумда жами 31 та ўйинда майдонга тушди ва ўз ҳисобига 15 та гол ҳамда 9 та голли узатма ёздириб қўйиишга эришди.

Матнда хатолик топсангиз, ўша хатони белгилаб, бизга жўнатинг (Ctrl + Enter)