“Ливерпуль” Салоҳ ўрнига атиги иккита гол урган футболчини олиб келмоқчи

“Ливерпуль” клуби ҳужум чизиғини кучайтириш мақсадида Базумана Турени асосий номзодлардан бири сифатида кўриб чиқмоқда. У жамоада Муҳаммад Салоҳ ўрнини босиши мумкин бўлган футболчилар қаторида тилга олинмоқда.

Хабарларга кўра, клуб келгуси мавсум учун таркибни янгилашни режалаштиряпти ва айниқса ҳужум чизиғида катта ўзгаришлар бўлиши кутилмоқда.  Шу сабабли, мерсисайдликлар Туре каби ёш ва иқтидорли футболчиларга қизиқиш билдирилмоқда.

Айни пайтда Германия Бундеслигасида “Хоффенхайм” жамоаси шарафини ҳимоя қилаётган 20 ёшли ивуарлик ҳужумкор футболчи ўзининг тезлиги ва техникаси билан эътиборга тушган. Айни пайтда у “Ливерпуль” скаутлари томонидан диққат билан кузатилмоқда.

Таъкидлаш жоизки, Базумана Туре Бундеслигада иккинчи мавсумини ўтказмоқда. Ўтган чемпионатда 13 марта майдонга тушган футболчи голлар ҳисобини оча олмаганди. Жорий мусобақада эса, 24 та учрашувда қатнашиб, бир жуфт гол урди.

Шу билан бирга, бу трансфер ҳали дастлабки босқичда экани ва ҳеч қандай расмий келишув мавжуд эмаслиги таъкидлаш айтиш керак. “Ливерпуль” мутасаддилари ҳозирча турли вариантларни ўрганмоқда.