“Ливерпуль” шартнома бергани йўқ

Англиянинг амалдаги чемпиони “Ливерпурпуль”нинг етакчи ҳимоячиларидан Эндрю Робертсон клуб раҳбарияти унга ҳамкорликни узайтириш бўйича янги шартнома таклиф қилмаганини маълум қилди.

- Мен янги шартномани рад этдим ёки шунга ўхшаш ҳолат бўлди, дейиш нотўғри. Менга  янги битим бўйича таклиф бўлган эмас.

Фақат бу бўйича гап бўлди холос.

Бу шундай суҳбат эди: “Яхши, мен нимани хоҳлайман, ўйнашни хоҳлайман ва ҳали ҳам ўйнаш учун етарлича яхши эканимга ишонаман”.

Менимча, нималарга қодирлигимни жорий мавсумда ҳам кўрсатдим. Ўтган мавсумда кетишга яқин эдим, лекин қолишга қарор қилдим. Январда ҳам худди шундай бўлди,-  деди Робертсон Sky Sports нашрига.

Ўтган ҳафта Робертсон мавсум охирида, шартномаси тугагач, “Ливерпуль”ни тарк этишини эълон қилган эди. Аввалроқ, унинг “Тоттенхэм”га ўтиши мумкинлиги ҳақида хабарлар тарқалган.

Ҳимоячи 2017 йилдан буён мерсисайдликлар сафида ўйнаб келмоқда. Шу вақт ичида у барча мусобақаларда 373 та ўйин ўтказиб, 13 та гол урди ва 69 та голли узатма берди.