“Ливерпуль” учта катта муаммога дуч келди

Жорий мавсумда Англия Премьер-лигасида ғолиб чиқишга яқин турган “Ливерпуль” таркиб масаласида жиддий қарорларни қабул қилишига тўғри келмоқда.

Жамоа етакчилари – Муҳаммад Салоҳ ва Виржил ван Дейкни ҳамкорликни икки йилга узайтиришга кўндирган “Ливерпуль” мутасаддиларини яна учта катта муаммо кутиб турибди.

Ҳозирги таркиб етакчиларидан уч нафарининг клубдаги келажаги мавҳум бўлиб турибди ва улар ёзда жамоани тарк этиши мумкинлиги айтилмоқда.

“Ливерпуль” директорлар кенгаши Луис Диас, Иброҳим Конате ва Диогу Жота билан ҳамкорлик масаласини жорий мавсум якунланганидан кейин муҳокама қиладиган бўлди.

“Қизиллар” бир неча клублар нишонида турган бу ўйинчиларни қўлдан чиқариш эҳтимоли ошиб бормоқда.  Айниқса, ҳимоячи Конате масаласи мураккаб. Football Insider нашрининг ёзишича, бу футболчи маош масаласида келиша олмагани учун яқинда клуб таклиф қилган янги шартномани қабул қилмади.

Шунингдек, клуб жорий мавсум жамоанинг ҳужумкорлигини таъминлаб келган Луис Диас ва Диогу Жотанинг келажаги бўйича аниқ позициясини маълум қилмаса, ҳар икки ўйинчи бошқа клубларга ўтиб кетиши мумкинлиги айтилмоқда.