"Ливерпуль" йўқотишларга учради

Роберто Фирмино ва Жеймс Милнер жароҳати сабаб "Ливерпуль"нинг кейинги икки ўйинини ўтказиб юборади. Бу ҳақда мерсисайдликлар бош мураббийи Юрген Клопп маълум қилди.

Ушбу футболчилар 26 ва 30 декабрь кунлари бўлиб ўтади премьер-лиганинг "Астон Вилла" ва "Лестер"га қарши учрашувларида жамоага ёрдам бера олишмайди.

Аммо соғайиб кетган ҳимоячи Трент Александр-Арнольд ва ярим ҳимоячи Алекс Окслейд-Чемберлен майдонга тушиши мумкин. Нидерландия терма жамоаси сафидан “Ливерпуль”га қайтган ҳимоячи Виржил ван Дейк ҳам учрашувларга ҳозирлик кўрмоқда.

Бундан ташқари, 27 декабрдан Франция терма жамоаси сафида ЖЧ-2022 финалида Аргентинага қарши ўйнаган (3:3, пен. 2:4) Иброҳим Конате машғулотларга қўшилади.