“Ливерпуль” юлдузи “Реал”га кетиб қолади

Англиянинг амалдаги чемпиони “Ливерпуль” ва жаҳон чемпиони Аргентина терма жамоаси ярим ҳимоячиси Алексис Макаллистер фаолиятини Испания чемпионатида давом эттириши мумкин.

Бир неча манбаларнинг ёзишича, 26 ёшли футболчининг хизматларига “Реал” жиддий қизиқиш билдирмоқда. Аргентиналик юлдузнинг ўзи ҳам муҳитни ўзгартириш мақсадида “Қироллик клуби”га кўчиб ўтишга қарши эмас.

Мадридликлар бу трансферни январга мўлжаллаган. Агар мерсисайдликлар қишки трансферлар даврида етакчи ўйинчисини қўйиб юборишга кўнмаса, бу масала ёзга қолдирилади.

Алексис “Ливерпуль” таркибида 2023 йилнинг ёзидан бери ўйнаб келади. Унинг амалдаги шартномаси 2028 йилнинг ёзигача тузилган. Transfermarkt порталида ярим ҳимоячининг нархи 100 миллион евро экани кўрсатилган.