"Локомотив" футболчиси: "Мавсумни 1-ўринда якунладик, демак ўзимиздан кучли жамоа билан ўйнамадик"

Про лигадан Суперлигага қайтган "Локомотив" жамоаси  футболчиси Абдуллоҳ Йўлдошев клуб матбуот хизматига якунланган мавсум ва бошқа бир қатор саволларга жавоб берди.

- Якунланган мавсум ҳақида фикрларингиз? Ўйинлар сонининг камлиги жамоага қанчалик таъсир қилди?

- Якунланган мавсум биз учун зўр ўтди. Ҳаммаси биз истагандек якунланди. Ўйинлар сонининг камлиги жамоага унчалик катта таъсир ўтказди, деб ўйламайман. Мавсумни биринчи ўринда якунладик, демак ўзимиздан кучли жамоа билан ўйнамадик ва шу боисдан жамоада ўсиш кўринмади, деб ўйлайман. Бу лигада рақобат камроқ бўлди.

- Ушбу мавсумда 2 та гол уришга муваффақ бўлдингиз. Бу сиз учун яхши натижами? Ўз ўйинингиздан кўнглингиз тўлдими?

- Иккита гол мен учун, ҳимоячи учун яхши натижа деб ҳисоблайман. Ушбу мавсумдаги ўйинларимдан кўнглим тўлди. Бошқача қилиб айтганда, ўзимнинг ўйинимдан қониқиш хосил қилмаган ўйин бўлмади. Умумий қилиб айтганда, бу мавсум мен учун ёмон ўтмади.

- Мавсумдаги энг қийин ўйин сиз учун қайси бири бўлди?

- 19-турда Тошкентда "Олимпик-Мобиуз"га қарши ўйинни айта оламан. Унда 1:1 ҳисоби қайд этилди. Иккала жамоа ҳам ғалабага ўйнади. Рақибларнинг яхши ўйини ва ҳакамлик сабабли бироз қийналиб қолдик. Ўша кун барчасини ҳал қилишимиз мумкин бўлганди. Босимга бой ўйинда ҳамма қийналди.

- Келаси мавсум ҳақида фикрларингиз.

- "Локомотив" янги мавсумда Суперлигага кучли бўлиб қайтади. Келаси йили Суперлигада кураш анча қизғин бўлиши жамоаларнинг трансферларидан билиниб турибди. Барча рақибларга кураш таклиф қиламиз. "Локомотив" билан юқори ўринларни эгаллаш насиб қилсин.