Бугун Суперлиганинг 23-тур доирасида АГМК - "Локомотив" учрашуви бўлиб ўтади. Ўйин олдидан "Локомотив" матбуот хизмати беллашувга оид маълумотларни тақдим этди.

Турнир жадвалида иккинчи ўринда бораётган "Локомотив" Олмалиқда АГМК меҳмони бўлади. "Локо" 41 очко билан иккинчи ўринни эгаллаб турибди. АГМК ҳисобида эса 25 очко мавжуд бўлиб, бу жамоа 9-ўринда боряпти.

Сафарда очко тўплаш бўйича "Локомотив" 10-ўринда. "Темирйўлчилар" шу пайтгача меҳмонда 10та ўйин ўтказиб, шундан иккитасида зафар қучишган, 5 бор дуранг ўйнаб, 3та беллашувда имконият бой берилган. Тўплар нисбати 9-10. Тошкентликлар сафарда 11 очко тўплаган.

"Локомотив" шу пайтгача сафарда "Бухоро" ва "Насаф"ни мағлуб этиб қайтган ҳамда "Металлург", "Сурхон", "Бунёдкор", "Қўқон-1912", "Қизилқум" жамоалари билан дуранг ўйнаган. "Металлург"га қарши баҳс 0:0, қолган учрашувлар эса 1:1 ҳисобида якун топган.

Ўтган турни ўз майдонида "Бухоро"га қарши ўтказган "Локо" 2:0 ҳисобида зафар қучди. Олег Зотеев билан Диёр Туропов томонидан киритилган голлар "термирйўлчилар"га навбатдаги уч очкони тақдим этди.

Биласизми? "Локомотив" Суперлигада қаторасига 8 ўйиндан бери ютқазмай келмоқда.

Бугунги беллашув АГМК учун уйдаги 12-учрашув бўлади. Уйда очко йиғиш бўйича олмалиқликлар 8-поғонани эгаллаб туришибди. АГМК уйдаги ўйинларда 4тадан ғалаба ва дуранг қайд этиб, 3 бор мағлуб бўлган. Тўплар нисбати 18-13.

АГМК охирги иккита турни ғалаба билан якунлади. Бу жамоа ўз майдонида "Насаф" ва сафарда "Бунёдкор"ни мағлуб этди.

Шу ўринда Олмалиқ шаҳрида бўлиб ўтган охирги бешта ўйинни ёдга олсак:

2018. АГМК - "Локомотив" 1:0

2017. АГМК - "Локомотив" 1:3

2016. АГМК - "Локомотив" 2:5

2015. АГМК - "Локомотив" 2:2

2014. АГМК - "Локомотив" 0:1

Меҳмонда кечган охирги бешта ўйиннинг учтасида "Локомотив"нинг қўли баланд келган. Бир бор дуранг қайд этилиб, ўтган йилги баҳсда пойтахтликлар кичик ҳисобда имкониятни бой берган. Охирги бешта ўйиндаги тўплар нисбати 11-6, "Локо" фойдасига.