Лукаку бу ер сенга Италия эмас!

“Рома”, “Ювентус” ва “Милан” клубларини бошқарган тажрибали мураббий Фабио Капелло “Челси” ҳужумчиси Ромелу Лукакунинг ўйин сифати пасайиб кетганининг сабабини айтди. Бельгиялик футболчи “Кристал Пэлас”га қарши ўтказилган ўйинда атиги етти бор тўпга тегинган эди.

- Ромелу Лукаку “Интер”да Антонио Конте қўллаган қарши ҳужум усулига жуда мос тушганди. Чунки бу жамоада жуда кўп бўш ҳудуд бўлган. Лукакунинг тезкорлиги ва жисмоний қуввати А Серия ҳимоячилари қаршисида унга устунлик берарди. “Челси” калта паслар билан ўйнайди ва Лукаку ҳаракатланиши учун жой етишмаяпти.

Англия премьер-лигаси ҳимоячилари Лукакуга сингари жисмоний бақувват ва унга узоқ вақт қаршилик кўрсата олади. Ҳозир унга Италиядаги бўш ҳудудлар ва куч етишмаяпти, - деди Фабио Капелло.

Лукаку жорий мавсумда премьер-лигада 17 маротаба майдонга тушиб, атиги бешта гол урди. Бу кўрсаткич ҳужумчи учун 97,5 миллион фунт сарфлаган “аристократлар”ни умуман қониқтирмаяпти.