Мадрид супер клуби Ўзбекистон терма жамоасига гол урган футболчини сотиб олди

Испания ёшлар терма жамоаси ҳимоячиси Марк Пубил "Алмерия"дан Мадриднинг "Атлетико" клубига ўтди. Бу ҳақда "Атлетико" матбуот хизмати хабар берди.

"Марк Пубил энди "Атлетико Мадрид" футболчиси ҳисобланади. "Алмерия"дан ўтган ўнг қанот ҳимоячиси тиббий кўрикдан ўтиб, клубимиз билан 5 йиллик шартнома имзолади.

Бўйи 190 см бўлган 22 ёшли футболчи яқинда бўлиб ўтган Европа чемпионатида иштирок этган Испания U-21 терма жамоасининг ўнг қанот ҳимоячиси ҳисобланади. У ўтган ёзда Париж Олимпиадасида олтин медални қўлга киритган Санти Дения бошчилигидаги Испания олимпия терма жамоаси таркибида эди.

Шартнома имзолангандан сўнг ва янги уй билан танишгандан сўнг, Марк Пубил Жонни Кардосо билан бирга Лос-Анжелес-де-Сан-Рафаэлга асосий жамоанинг мавсумолди йиғинига қўшилиш учун йўл олди. Марк, хуш келибсан!" - дейилади клуб хабарида.

Эслатиб ўтамиз, 2024 йилги Париж Олимпиадасида Испания ҳамда Ўзбекистон терма жамоалари гуруҳ босқичида тўқнаш келишганди. Ўшанда, Пубил вакилларимиз дарвозасини 29-дақиқада ишғол этган эди.