Мадридга келасанми? “Реал” қимматбаҳо чемпионга шартнома таклиф қилди

“Ливерпуль” таркибида ўтган мавсум Англия чемпионлигини қўлга киритган франциялик ҳимоячи Иброҳим Конате фаолиятини Испания чемпионатида, аниқроғи Мадриднинг “Реал” клуби сафида давом эттириш имкониятига эга.

Таниқли инсайдер Николо Скиранинг хабар беришича, “Реал” спорт бўлими мутасаддилари аллақачон франциялик футболчига таклиф билан чиққан.

Гап узоқ муддатли шартнома ҳақида кетмоқда: мадридликлар 26 ёшли ҳимоячига 2031 йил ёзигача бўлган келишув таклиф қилишга тайёр. Бунинг учун Конате Мадридга жорий мавсум якунлангач, эркин агент мақомида кўчиб ўтиши лозим.

Конатенинг “Ливерпуль” билан амалдаги шартномаси 2026 йилнинг 30 июнигача амал қилади. Илгари футболчи ва инглиз клуби ўртасида шартномани узайтириш бўйича музокаралар тўхтаб қолгани ва келишув бўйча ҳеч қандай жиддий силжиш йўқлиги хабар қилинган эди.

Қизиғи шундаки, 2025 йил ноябрь ойида The Athletic журналисти Давид Орнштейн “Реал” вакиллари “Ливерпуль” раҳбариятини Конатега қизиқиш йўқлиги ҳақида хабардор қилганини таъкидлаган эди.

Жорий мавсумда ҳимоячи “Ливерпуль” сафида барча мусобақаларда 31 та ўйин ўтказиб, ҳимоядаги вазифаларини бажаригдан ташқари рақиблар дарвозасига бир жуфт гол уришни ҳам уддалади.