Мадридист ва реппер. Футболчининг фаолиятига назар

Ройстон Дренте – интригага бой футболчи. Қаерда ўйнаганидан қатъий назар ҳар доим интригага бой воқеаларга аралашиб юрган футболчи. “Реал”нинг собиқ футболчисини балки сиз ёддан чиқаргандирсиз, лекин у ўзи учун ўйнашда давом этмоқда.

Ҳозирда у Голландиянинг учинчи дивизионида қатнашадиган “Козаккен Бойз” жамоасида тўп суради. У ҳозир ҳам юқорироқ даражадаги жамоаларда тўп суришга қодир эканлигини билади, аммо бу ҳақида ортиқча бош қотирмайди. Унга ҳозир ўйнаётган жамоаси қулай.

2007 йилда бутун Европани ҳайратда қолдирган Дренте “Реал” сафига ўтган эди. Ўшанда Ройстон 21 ёшда бўлган. Ўша пайтларда у яхши формада эди. Ундан умид катта эди.

У Мессини ирқчилик қилишда айблаганди, “Эвертон” мураббийи Девид Мойесни ҳақорат қилганди. Барчаси ўтмишда қолди.

Барчаси “Фейнорд”да бошланганди. Дренте ўша жамоада юлдуз бўлиб порлаган эди. “Фейнорд”нинг эшигини топ клублар тақиллата бошлади.

“Ўша пайтларда менга 16 та жамоа қизиқиш билдирганди. Мен “Барселона” президенти Жоан Лапорта ва “Реал” директори Предраг Миятович билан гаплашган эдим” – дейди Дренте Four Four Two нашрига берган интервюсида.

“Мен барча жамоалар биалн шартнома имзолашни истар эдим. Барча жамоалар деярли бир хил 5 йиллик шартнома ва мени қониқтирадиган бандларни тақдим этарди. “Реал” менга қизиқроқ туюлди. Бунга сабаб бир пайтлар намойиш этилган “Гол!” филми эди. Бу филм менга жуда ҳам ёқарди.

“Реал” футболчи учун 14 млн евро тўлади. Дренте “Севилья”га қарши суперкубок баҳсида ўз дебютини ўтказди. Ўша ўйинни ўзида узоқдан зарба бериб гол урди.

“Мени ҳамма яхши кутиб олди. Гути мени худди ўзиникилардек қабул қилди. Ахир у Мадрид афсонаси эди. Робиньо билан дўст бўлиб олдим. Тез-тез уникига меҳмонга бориб турардим.” – деб хотирлайди Дренте.

2009 йилда эса Марсело сотиб олинади. Бу эса Дренте учун нохуш хабар эди. Марсело унинг ўрнини эгаллади. Дренте эса “Эркулес”га ижарага берилди. У ерда эса раҳбарият билан келиша олмасдан бошқа клуб излай бошлади. “Эвертон” эса унга харидор эди.

Девид Мойес уни Англия кубоги ярим финали олдидан жамоа йиғилишига кеч қолгани учун жазолайди. Табиийки, бу Дрентега ёқмайди ва натижада мураббий ва футболчи бир-бирини ҳақоратлайди. Дренте нарсаларини йиғиштиради ва жамоани тарк этади. Мадридга қайтиш насиб этмайди. 2012 йилда унинг “Реал” билан тузган шартномаси ўз якунига етади.

Россияга келади. “Алания” билан шартнома имзолайди ва у ерда 6 та ўйинда битта хет-трик қилган Дренте Россияда кўп ушланиб қолмади. 2013 йилда Англияга қайтади. “Рединг” билан шартнома имзолаган Ройстон янги жамоасида 1 мавсум тўп суради. Кейин Англиянинг бошқа бир жамоаси “Шеффилд Уенсдей” билан келишиб олади. У ерда ҳам ишлари юришмайди. Энди бошқа мамлакат жамоаларида ҳам тўп суриш нияти пайдо бўлади. 2015 йилда Туркиянинг “Кайсери Эджиесспор” жамоаси футболчига шартнома таклиф қилади. Дренте Туркияга йўл олади. Туркиядан Бирлашган Араб Амирликларига йўл олади. У ердаги жамоаси “Бани Яса” эди.

2016 йилда Дренте футболдан зерикканлигини тушуниб етади. Энди ўзини репда синаб кўрмоқчи бўлади. Roya2Face тахаллуси остида ижод қила бошлади. Бир қанча мусиқалар чиқарганидан сўнг, у севимли касбини топгандек ҳис қила бошлади ўзини.

“Мен ҳар доим мусиқани севганман. Хурсанд бўлганимда, хафа бўлган вақтларимда мусиқа эшитаман. Мусиқа доим мени руҳлантириб турган” – деган эди Дренте ББC Спортга берган интервюсида.

Репперлик фаолияти узоққа чўзилмади. 18 ойдан сўнг у яна футболга қайтишни истаб қолди. Таклифлар бор эди. Улардан бири Роттердамнинг “Спарта”сидан эди.

Камбек ўхшади. Иккинчи дивисион жамоасида Дренте ўзини ҳар томонлама ижобий кўрсата олди. Унинг ёрдами билан жамоа биринчи дивизионга чиқди. Ройстон 5 та гол ва 6 та голли узатмани ўз ҳисобига ёздириб қўйди. У 32 ёшда эди ва тушуниб етдики, энди у масъулиятни бўйнига олишни истамайди.

Биринчи дивизионда ҳамманинг эътиборида тўп суришни ўрнига учинчи дивизиондаги “Козаккен Бойз” жамоасига ўтиб кетади. У ерда Дренте 1 та гол 3 та голли узатмани амалга оширади. Балки, унда ҳаммаси олдиндадир. Албатта, “Спортпарк де Зваер” “Бернабеу” эмас, аммо энг муҳими, Дренте ҳозир бахтли.

“Мен ҳеч қачон афсусланмайман. Ҳеч нарса бекорга бўлмайди. Мен қаерда бўлсам, ўша ерда ўзимни бахтли ҳис қиламан. Мен бугунги куним билан яшайман. Мен – Ройстонман. Қолгани менга қизиқ эмас”