Мағлубиятдан кейин уч юлдуз “Реал” таркибидан чиқарилди

Испания чемпионатининг 26-турида “Реал” футболчилари ўз майдонида “Хетафе”дан 0:1 ҳисобида қақшатқич мағлубиятга учради.

Бундан ташқари, мадридликлар 27-турда “Сельта” билан бўладиган ўйин олдидан кадрлар масаласида ҳам катта йўқотишга учради.

Гап шундаки, жамоа етакчи ҳимоячиларидан Дин Хёйсен ва Альваро Каррерас, шунингдек, ҳужумкор футболчи Франко Мастантуоно кейинги баҳсда иштирок этмайди.

Чунки “Хетафе”га қарши ўйинда Хёйсен ва Каррерас чемпионатдаги бешинчи сариқ карточкасини олди ва дисквалификация сабабли кейинги ўйинни ўтказиб юборади.

Мастантуоно эса тўғридан-тўғри қизил карточка олиб майдонни тарк этган.

Жорий мавсумда Хёйсен 33 ўйинда бир гол ва икки ассист, Каррерас 34 ўйинда икки гол ва икки ассист, Мастантуоно эса 26 ўйинда уч гол ва бир ассист қайд этган.