Мағлубиятлардан чарчаган ва ғалабали юришини бошлаган "Турон"нинг қаршисида энди мавсумнинг сюрприз жамоаси!

Суперлигада чақилмас ёнғоқ вазифасини бажариб келаётган “Сурхон” бу турда “Турон”ни қабул қилади. Яхши ўйин бўлиши шубҳасиз. Сабабини билсангиз керак. Термизликларга ҳозир таъриф бериб ўтдик ва охирги учта ўйиннинг 2 тасида ғалаба қозониб, 1 тасида дуранг ўйнади. “Сурхон” бу энди олдинги “Сурхон” эмас.

Хўш, унинг рақиби “Турон”-чи? Биринчи даврада ғалаба қозонишни уддалай олмаган жамоа иккинчи даврани кетма-кет иккита ғалаба билан бошлаганига нима дейсиз? Албатта, вазият бундай тус олишининг сабаблари бисёр. Биринчи даврадан кейин жамоадаги молиявий ҳолат туфайли мураббийлар ва етакчи ўйинчилар тарк этишди. Иккинчи давра олдидан Ёрқин Назаров бош мураббийликка чақирилди. Таркиб деярли ёшартирилди. Ёшлар билан ишлашни яхши биладиган мутахассис эса ҳеч қанақа босимсиз ўз ўйинини кўрсатиш ҳаракатига тушишди. Натижада “Бухоро” майдонида 2:3 ва Яйпанда “Насаф”ни 1:0 ҳисобларида таслим қилган ҳолда “Турон” ҳали “тирик” эканини исботлашга тушдилар.

“Сурхон” – “Турон” қарама-қаршилиги чиндан муросасиз ўтади. Таркиб жиҳатидан бир-бирига ўхшаб кетади. Яна бир эътиборга молик томони шундаки, “Турон” бош мураббийи Ёрқин Назаров “Сурхон” клубида фаолият олиб борган ва жамоанинг ҳозирги ҳолатини, шу даражага етиб келиш жараёнида ўзи қатнашган ва яхши билади. Шу нуқтаи назардан олиб қараганда ҳам ўйиннинг аҳамияти юқори. Назаров собиқ жамоасидаги плюс ва минусларини билган ҳолда шогирдларини шунга яраша тайёрлаётгани табиий.

“Сурхон” мавсум сюрпризи бўлса, “Турон” иккинчи давранинг сюрпризи бўладигандек. Шунингдек, жамоаларнинг ўзаро ўйинлар тарихи ҳам яқиндагина бошланганига эътиборингизни қаратмоқчимиз. Жамоаларнинг илк тўқнашуви 2021 йилнинг 19 май санасига тўғри келади. Ўшанда “Сурхон” ўзининг мезбонлигидаги баҳсда 1:0 ҳисобида ғалаба қозонган. Иккинчи даврада Яйпандаги беллашувда томонлар 1:1 ҳисобида дурангга рози бўлишган. Жамоаларнинг учинчи тўқнашуви бу йил март ойида Яйпанда бўлиб, яна 1:1 ҳисоби қайд этилди.

Бугунги учрашув жамоаларнинг тўртинчи ўйинига айланади. Кўриб турганингиздек, “Сурхон”да бир ғалаба бор ва яна иккита учрашув дуранг билан якун топган. Тўплар нисбати ҳам шунга яраша кичик рақамларда акс этган: 3/2 термизликлар фойдасига, ҳозирча. Ҳа, “Турон” ҳали “Сурхон”ни мағлуб этмаган. Лекин бу сафар ушбу ишнинг уддасидан чиқа олса, ишонинг бу ажабланарли бўлмайди. Ахир ёш “турон”чиларнинг “Насаф”ни мағлуб эта олганини унутманг. Қолаверса, иккала жамоа ҳам иккинчи даврани мағлубиятсиз бошладилар. Айниқса, мағлубиятлардан чарчаб кетган “Турон”нинг кетма-кет иккита учрашувда ғалаба қозониб, мухлисларига умид бағишлагани эвазига бу сафар ҳам ушбу ёқимли серияни давом эттириш иштиёқида “ёнаётган”лари шубҳасиз.

Яна бир гап: иккала жамоа ҳужумкорликни ёқтиради. Шунинг учун очиқ футбол кўришимиз ҳам ҳеч гап эмас. Демак, голлар шоуси бўлиб қолса бундан ажабланманг.

Шуҳратбек Жўраев.