Макс Холлоуэй – Чарльз Оливейра: Икки афсона, бир камар!

Хабарингиз бор, Ўзбекистон вақти билан 8 март куни "UFC 326" турнирида америкалик Макс Холлоуэй ва бразилиялик Чарльз Оливейра BMF камари учун тўқнаш келади.

Аввалги сафар Холлоуэйнинг қўли баланд келган эди (баҳс пайтида Чарльз ноқулай йиқилгани натижасида бўйнидан жароҳат олган ва техник мағлубият ёзилган), аммо орадан қанча сувлар оқди. Бу сафар кимнинг зафар қучишини прогноз қилиш ўзига ишонган экспертларни ҳам роса қийнаб қўяди. Зеро биттаси тик оёқда, иккинчиси эса ерда ўлжаларини овлашга ҳаракат қилади. Омад кимга, қачон, қайси ҳолатда келишини олдиндан айтиш инсонга хос хусусият эмас.

Тарихда бешинчи бор амалга ошажак бахс бутун UFC ихлосмандлари тарафидан тўрт кўз билан кутилмоқда. Токи Холлоуэйга қадар аввал мазкур соврин ҳеч кимнинг белида бир маротабадан кўп қолмаган эди. Ушбу спортчи икки бор белига тақишни уддалагани етмаганидек, учинчи бор ола кўзларини тикди. Худди бир пайтлар ярим енгил вазн тоифасида якка ҳукмронлик қилганидек. Аммо унинг бу ҳокимияти Волкановски қуёши отгунча  давом этди. Австралиялик ММАчи қаҳрамонимизга ярим енгил вазнда кўзларига дунёни тор қилган эди. Ҳеч нарса абадий эмас экан, нега энди бу воқелик BMF да такрорланмасин?! Ахир Оливейра оддийгина рақиб эмас-ку. Шунингдек, Чарльз реванш жангларининг барчасида ғалаба қозонган (4-0).

Дастлаб бразилиялик жангчининг имкониятларини кўриб чиқамиз. “UFC ғозийи” атамасининг етакчи вакилларидан бири ҳисобланадиган спортчи мазкур промоушендаги кўплаб рекордларнинг соҳиби саналади. Жумладан, энг кўп бонус (21) қўлга киритган ҳамда энг кўп сабмишн (17) ва энг кўп муддатидан олдин эришилган ғалабалар (21) билан нафақат бугуннинг, балки тарихнинг энг кучли жангчиларидан бири эканини исботлаган. Камтарлигини ҳам инобатга олсак, мухлислар уни не қадар севишини тасаввур қилиш мумкин.

Услубига тўхладиган эрсак, BJJ (бразилиан жиу-житсуси)да моҳир, партердаги ўйин IQ си юқори, сабмишнларида кенг репертуарга эга. Қолаверса рақиби тик оёқда экан, бел халтаси каби ёпишиб олиш услуби, деганда ҳам илк ҳаёлга келадиган исм - Чарльз. Партерда кучли, аммо тейкдаунга олиб ўтишини муваффақиятли, деёлмаймиз. Тейкдоунга ташаббус қилишдан кўра клинчгача кутади ва клинчдан кейин ёки рақибининг белига халта каби ёпишиб олади, ёки панжарага қадайди. Шунинг учун, тейкдауни яхши бўлган жангчиларга қарши ғалаба қозонолмаган - Арман Царукян, Ислом Махачев бунга яққол мисол. 

Тик оёқда эса рақиби каби таҳдид туғдира олмайди. Муштлари ва оёқ зарбалари портловчи кучга эга эмас. Шу боис, тез-тез клинчга уриниши мумкин ва муддатидан аввал тугатишни истаса, ёки очколар ҳисобига ютишни хоҳласа, партердаги назорат вақтини ошириши, вақтни чўзиши, турли хил ташаббусларни амалга ошириши унинг ушбу баҳс учун режалаштирган тактикаси экани кундек равшан.

Оливейра деганда, илк бор онгимизда рақибининг белига халта каби ёпишиб олган расми келади. Хўш, Холлоуэй деганда дастлаб хаёлимизга нима келади? Жанг тугашига кам вақт қолганда бармоқлари билан ёнини ишора қилиши ва “услуби қирпичоқ қиламиз, кел” дейиши, албатта. Қаҳрамонимиз бу ҳолатни UFC га олиб кирган жангчи ҳисобланади ва бу нарса промоушенда тез ёйилмоқда. Ҳозир “услуби қирпичоқ” дея номладик, аммо келажакда шахсан Холлоуэй номи билан аталса, ҳайрон бўлмаймиз.

Макснинг эса мутахассислар тарафидан ярим енгил вазн тоифасида UFC тарихидаги ТОП-3 жангчилар қаторига кириши мумкин экани иддао қилинади. Унга бу вазнда юқорида хам таъкидлаб ўтганимиздек, Волкановски кўзларига дунёни тор қилганди, лекин Топурия бира тўла қадамини узиб қўйди. BMF камари, балки, UFC чемпиони каби қийматга эга эмасдир, аммо камарлар ичра ўзига хос хусусиятлари билан ажралиб туради. Бу камарга эришиш учун октагонда кўп қон ва тер тўкишингиз лозим. Холлоуэй эса ушбу камар эгаси бўлишга 100 % ҳақли.

Услубига тўхталадиган бўлсак, Макс тик оёқда ажойиб жангчи. Ноодатий зарбалар қироли ва замбаракдек мушти бор. Халқ тилида буни “деҳқончасига уриш” деймиз. Бундай зарба еганнинг вой ҳолига. Шу пайтгача Ортегадан ташқари партерга тортувчи жангчи билан деярли тўқнаш келмаганини инобатга олсак, бу савиядаги жангчига қарши нималар қила олиши кичик сўроқ остида. Бу тенгламани ечиш учун мухлислар баҳсни не қадар ҳаяжон-ла кутаётганини суякларимизга қадар ҳис қиляпмиз. 

Топурия "страйкер" сифатида портловчи зарбалар берган, Чарльзнинг ерга чақирув хийласига учмаган, жанг кемаси рулини ўзи истаган тарафга буриб, жараённи ўзи бошқарган эди. Дастин Порье эса кучсиз зарбалар билан тик оёқдаги имкониятини кўкка совурган, ерда эса бўғилган эди.

Хулоса шуки, Макс тик оёқда ўзига тақдим қилинган имкониятдан унумли фойдалана оладими, йўқса Оливейра мақсадига эришадими? Ушбу саволларнинг жавоби жанг тақдирини бегилайди. Шояд баҳс бешинчи раундгача чўзилса, Оливейра “услуби қирпичоқ”қа рози эканлигини таъкидлаб ўтди. Бу ишнинг диссертациясини ёқлаган проффессор эса унга кўрсатмаларини берди. Бу ишнинг хоҳлаган пайтда қилинмаслигини, фақатгина сўнгги 10 сонияда амалга оширилиши кераклигини тилга олди.

Ушбу баҳснинг ғолиби Оқ Уйда Иля Топуря билан жанг қилиши мумкин. Ўша кечадан кейин ниҳоят Оқ Уй кардининг баъзи жангларини эълон қилар экан. Контендерлар орасида энг муносиби Арман бўлса-да, у диапазондан ташқарида. Шу боис, интерим камар соҳиби Жастин Гэтжи ва ушбу жанг ғолиби икковидан бири кўп эҳтимол тўқнаш келади. Қайси бири танланса ҳам ажойиб баҳс кўришимиз кафолатланган, аммо бу жангнинг ғолиби кўпроқ ҳақлироқ бу шарафга. Лекин Иля ўтмишда Максни ҳам, Чарлзни ҳам енгани, лекин Гетжи билан тўқнаш келмагани, қолаверса, интерим камари узоқ вақт бирлашмай қолиб кетмаслиги учун Гэтжининг имконияти бу икковиникидан кўпроқ.

Хуллас, бизни жуда ҳам қизиқ тўқнашув кутиб турибди. Қуйида эса жангчиларнинг қиёсий статистикасини тузиб чиққанмиз. Кўришингиз мумкин.

Азизбек ҒОЗИЙ тайёрлади